Farmers’ organizations, barangay, immawat iti water pumps

VIGAN CITY – Lima a makina a pagpadanum ti naiwaras kadagiti lima a grupo manipud ken ni Diputado Ryan Luis Singson bayat ti maysa taripnong a naangay itoy a siudad idi Nobiembre 8.

Saggaysa a water pumps ti inawat ti Dardarat, San Juan; mangngalap iti Magsingal; Nambaran Farmers’ Association (Sto. Domingo); Bulag Farmers’ Association (Bantay) ken San Mariano Farmers Association (Bantay).

Kinuna ni Dip. Singson a kiniddaw dagiti nadakamat a grupo dagiti bomba ti danum  sumagmamano a bulanen ti napalabas ket idi adda inted ni Agriculture Secretary Proceso Alcala, dagus metten nga inyawatna dagitoy tapno mausar dagiti mannalon.

“Sapay koma ta usarenda dagitoy iti pagsayaatan ti kaaduan,” kinuna ni Singson.

Itay napan a lawas, nainaguraran metten ti napapintas a covered court ti Bulala, Vigan a pinunduan met laeng ti opisina ti diputado. (Mancielito S. Tacadena)