Footer

Feeding program para 500 malnourished nga ubbing, iyussuat ti gobierno probinsial

VIGAN CITY – Maiyussuat ti feeding program kadagiti ubbing ditoy probinsia nga agsagsagaba iti malnutrision a maangay inton Disiembre 17 iti provincial capitol, inwaragawag ni Vice Gov. Jeremias “Jerry” Singson.

Kinuna ni Singson a maituloyen ti nasao a programa a manglapped iti panagraira dagiti ubbing iti probinsia nga agsagsagaba iti malnutrision babaen ti pannakikammayyet ti Department of Health ken iti koordinasion ni provincial nutrition officer Edith Castillo.

Segun ken ni Singson, naitudon dagiti 500 a malnourished nga ubbing a masarakan iti 22 a munisipalidad iti probinsia.

Innayon ti bise gobernador a mapakan dagiti malnourished nga ubbing iti uppat a bulan wenno 120 nga aldaw babaen ti tulong ti Madrigal Foundation a mangigasto amin a pagpakan kadakuada.

Kinunana nga aktual a mapakan dagiti ubbing iti launching ti nasao a programa iti provincial capitol ket kadagiti sumarsaruno nga aldaw, maipabaklayton iti DOH wenno municipal health officer agingga iti barangay health officer.

Kinuna ni Singson nga addanto maited a guidelines a suroten iti pannakabusbos ti pundo para iti pannakapakan dagiti malnourished nga ubbing.

Madakamat ditoy a ti Madrigal Foundation ti maysa kadagiti kangrunaan a mangsupsuporta kadagiti medical mission nga ang-angayen ti gobierno probinsial ken iti pannakapaadda dagiti ambulansia para kadagiti district hospitals.

Kabayatanna, impakaammo ni Singson a balligi ti naisayangkat a medical mission babaen ti initiatibo dagiti ex-seminarians a nagbasa iti Immaculate Conception Minor Seminary kas paset ti selebrasion ti Golden Anniversary ti nasao nga institusion.

Nupay nairanta laeng ti medical mission para iti kaparanget a barbarangay iti aglawlaw ti seminario, kinuna ni Singson nga agdagup iti 603 a pasiente ti naikkan iti libre a konsultasion ken libre nga agas idinto a 54 dagiti nagpaparut iti ngipen.

Kinuna ni Singson a napagnunummuanda nga alumni ti nasao a pagadalan a dakdakkelto ti medical mission nga angayenda iti sumaruno a tawen.

Kinuna ni Singson a maysa met a medical mission ti maisayangkat iti Vigan City kas paset ti panagkasangay ni Mayor Eva Marie S. Medina inton Disiembre 18.

Segun iti bise gobernador, tumiponto iti nasao a medical mission ti grupo ti Ilocos Surian Association of Hawaii a  mangisayangkat kadagiti medical mission ken pasalip iti sumagmamano nga ili iti probinsia ken iti Ilocos Norte manipud Dis. 18 agingga iti 23.#