Fertilizer subsidy naipaay mannalon ti Cabugao

CABUGAO, Ilocos Sur – Nakumpleto idi Mayo 17 ti panagiwaras ti ganagan ti gobierno munisipal ditoy iti panangidaulo ni Mayor Edgardo “Ediboy” Cobangbang, Jr.

Nangrugi ti pannakaiwaras ti ammonium sulfate a ganagan idi Mayo 8 ket uppat a barangay ti naggigiddan a mawarasan iti inaldaw   agingga a nakumpleto ti 33 a barangay ti Cabugao.

Maysa a sako ti ganagan ti libre a naited iti tunggal rehistrado a mannalon ti Cabugao.

Iti panagiwaras nga inmatonan ti municipal agriculture office, impakita laeng dagiti mannalon ti valid ID da nga inted ti munisipio kas  pammaneknek a lehitimoda a mannalon.

Manamnama nga usaren dagiti mannalon daytoy a ganagan iti umay a panagtatalon ti pagay.

Segun ken ni Cobangbang, naggapu ti pondo iti RA 7171 wenno Tobacco Excise Tax.  Immun-unan nga impakaammo ni Cobangbang a prioridad ti administrasionna ti benneg ti agrikultura iti ili ti Cabugao.#