Festival, padur-asenna ti turismo: tourism director

TAGUDIN, Ilocos Sur – Dakkel ti maitulong dagiti festival para iti pannakapapigsa ti turismo ditoy rehion uno, daytoy ti imbatad ti hepe ti turismo ti Region I iti interbiona bayat ti TIKANLU (Tinubong, Kankanen, Lubi-lubi) Festival a naangay ditoy nga ili idi Mayo 2-6.

Kinuna ni Department of Tourism Regional Director David Valera a supsuportaran ti opisinana dagiti festival agsipud ta babaen kadagitoy a parambak a maitampok ti kultura ken kannawidan ditoy Amianan a pangawis kadagiti turista tapno makipagpartisiparda iti selebrasion.

Kinuna ni Valera a babaen dagiti maangay a festival, maguyugoy dagiti turista a makipagrambak, kasta met a maaramat daytoy para iti pannakailako dagiti produkto ti ili.

Ni Valera ti kangrunaan a sangaili iti panagpiesta daytoy nga ili  a dimmar-ayan pay ni dati a Gobernador ti Isabela Grace Padaca.#