Fetus, nasarakan iti kalapaw

MAGSINGAL, Ilocos Sur – Agkarkarawa ti kapolisan ditoy no asino ti ina a nangiyanak iti fetus a nasarakan iti uneg ti nipa hut iti likudan ti maysa a videoke bar sadiay Barangay Panay Norte ditoy nga ili idi Enero 10.

Segun iti maysa a doktor iti Magsingal District Hospital, agarup dua agingga iti tallo a bulan ti nasarakan a fetus a mapapati a naiyanak iti idi kanikalima agingga iti kanikapito nga aldaw.

Kas maibatay iti police blotter, nasarakan ni Rodolfo Arabe y Rapacon, 54, baro, waiter, ken residente iti Barangay Fatima, Vigan City, ti fetus iti datar a suelo ti nipa hut a masarakan iti likud ti Lovestory Videoke Bar a masarakan iti Barangay Panay Norte ditoy nga ili.

Inisial a suspetsa a maysa kadagiti babbai nga agpapaay a GRO iti nasao a bar ti nangiyanak iti fetus.

Ngem kinuna ni Donna Romillo y Viloria, manadier ti nasao a videoke bar a temporario a nagserra ti paggiinoman manipud pay idi Disiembre 23 agsipud ta naggawid dagiti empleadona ket saanda pay a nagsubli.

Naipan ti fetus iti kustodia ti police station ti Magsingal idinto nga agtultuloy ti panagimbestiga dagiti polis.#