Fetus, nasarakan iti pagbasuraan

STA. MARIA, Ilocos Sur – Maysa a fetus ti nasarakan iti pagbasuraan ti Suso Beach iti Barangay Suso ditoy nga ili idi bigat ti Abril 20.

Iti report a dimmanon iti polis ditoy, bayat ti panagpinta ti maysa a trabahador a managan Rodel Oliveros y Macanas, 35, naasawaan, ken residente iti nadakamat a lugar iti maipatpatakder a cottage, nakitana ti maysa a box iti pagbasuraan ket idi linuktanna, maysa a fetus gayam ti naggianna.

Segun ken ni Dr. Roselyn Dofredo Barasi, municipal health doctor, babai ti fetus ket manipud iti lima agingga iti innem a bulanna.

Naitabon ti fetus iti sementerio ditoy iti agarup alas 3:00 ti malem ti Abril 20 babaen ti Rural Health Unit, DSWD office ken PNP personnel ti Sta. Maria.

Di pay ammo no asino nga ina ti nangibelleng iti fetus.#