Fingerlings ti bangus, iwaras ti BFAR mangngalap a nadidigra iti Bagyo Juan

BANTAY, Ilocos Sur – Lima nga ili iti Ilocos Sur ti mawarasan iti fingerlings ti bangus kas tulong kadakuada iti pannakadidigrada iti napalabas a Bagyo Juan, impakaammo ni Rogelio Ragunjan, hepe ti Fisheries Division ti Provincial Agriculture Office bayat ti eksklusibo nga interview ti Around Ilocandia Channel kenkuana idi Enero 18.

Itoy met laeng nga aldaw, immunan a naited ti 5,000 a fingerlings ti bangus iti ili ti Cabugao idinto a sumarunonto ti sabali pay a 5,000 iti umuna a lawas ti Pebrero. Karaman  kadagiti maikkan iti fingerlings dagiti ili ti Sta. Catalina, Caoayan, Santiago, ken Siudad ti Vigan.

“Umabot iti 50,000 a fingerlings ti maipaay iti probinsiatayo babaen ti Bureau of Fisheries and Aquatic Resources (BFAR), Region 1 kas tulong kadagiti nadidigra iti Bagyo Juan. Dagiti nadakamat nga ili ti pakaipaayanna ta isuda ti nangted iti report maipanggep iti pukawda iti fisheries kalpasan ti bagyo,” kinuna ni Ragunjan.

Malaksid iti bangus, sumaruno met a maiwaras dagiti tilapia fingerlings para kadagiti agtartaraken iti daytoy a lames a nadidigra iti kalamidad.

Kabayatanna, pinagyamanan ni Danilo Garcia, barangay captain ti Dardarat, Cabugao, Ilocos Sur daytoy naiwaras a fingerlings kadakuada ta dakkel ti maaramidanna tapno makabangon dagiti kabarangayanna a naapektaran ken naawanan iti pagsapulan gapu iti panagtalaw dagiti pupokda a lames.

“Daytoy ti gundawaydan a makabawi isu nga idawdawatko kadagiti kalugarak nga aggagetda koma a mangtaraken kadagiti naited kadakuada tapno saan met a maupay ti gobierno probinsial a mangipapaay iti kakastoy a pagsayaatan dagiti umili,” kinuna ti kapitan.

Maysa a prioridad a programa ti provincial government ti pannakapaadu iti lames tapno masupusopan ti 10% a pagkurangan ti suplay ti lames iti Ilocos Sur.#