Fire officer, napapatay

BANTAY, Ilocos Sur – Kalpasan ti pannakapapatay ti barangay captain ti Barangay Napo, Sto. Domingo, simmublat ti maysa a Fire officer a pinapatay dagiti armado a tattao a riding in tandem iti national highway a sakup ti barangay Boquig ditoy nga ili idi malem ti Nobiembre 9.

Pimmusay iti Metro Vigan Cooperative Hospital a nakaitarayanna ni Fire Officer III Antonio Cariño y Folledo, 48, naasawaan, residente iti Barangay Sinabaan, ditoy nga ili ken nakadestino iti Vigan City Fire Station  gapu kadagiti sinagrapna a sugat iti nadumaduma a paset ti bagina.

Kinuna ni City Fire Marshall Floro Obrero a kalpasan ti panangaldawda, naggawid ni Cari├▒o ta adda mapanna alaen a reportna ngem mapapati a sinurot dagiti nangpaltog kenkuana.

Kinuna ti polis ditoy agpadaya ti biktima a nakalugan iti motorsiklona a Honda Wave iti national highway a sakup ti Barangay Boquig ditoy nga ili iti agarup alas 12:25 ti Nobiembre 9 idi pinaltogan dagiti nangsurot kenkuana a suspek iti sumagmamano a daras a nakasugatan ti nadumaduma a paset ti bagina.

Naglibas a nagpadaya dagiti suspek kalpasan ti pammaltog.

Naitaray ti biktima iti MetroVigan Cooperative Hospital ngem pimmusay bayat ti pannakatamingna.

Nangipatulod ti Bantay police station iti flash alarm kadagiti kabangibangna nga ili ngem negatibo ti resultana.

Nakarekobre dagiti nagresponde a polis iti crime scene iti innem a kapsula ken maysa a deformed slug a naggapu iti cal. 45.

Maysa a di nainaganan a saksi ti nagkuna a nagaruat ti triggerman iti nangisit a diaket, nakakallugong iti bull cap, ken naka-shades iti nalidem.

Kinuna ti anak ti biktima a ni May nga awan ti ammona a kinariri ti amana.

Ngem segun ken ni Joel Javier, inbestigador ti Bantay PNP, kitkitaenda no adda pakainaigan ti pannakapapatay ti fire officer iti napalabas a kasona ti pammaltog iti Barangay Ora idi 2008.

Nupay kasta, kinuna ni Javier a nadamagda a nadismis ti nasao a kaso.#