VIGAN CITY – Rinugian ti Bureau of Fire Protection a selebraran ti Fire Prevention Month babaen ti maysa a motorcade iti Metro Vigan itay Marso 1.
Nakipartisipar iti motorcade dagiti personnel ti BFP manipud iti nadumaduma a fire stations iti umuna a distrito a nakalugan iti bukodda a fire truck.
Kanaig daytoy, imballakad dagiti fire marshal ti panagannad dagiti umili tapno malapdan ti panagbalinda a biktima iti uram.
Ditoy Vigan City, nagisayangkaten ti BFP iti inspeksion kadagiti pasdek-negosio, boarding houses ken dormitories nangruna dagiti daan a waya ken koneksion iti koriente a kangrunaan a pagtaudan iti uram.#
