Fire truck, nakiddaw a maidonar

SAN JUAN, Ilocos Sur – Nakiddaw iti sangguniang bayan ti panangidonarna iti maysa a fire truck iti Bureau of Fire Protection ditoy nga ili.

Babaen ti maysa a resolusion, kiniddaw ti Bureau of Fire Protection nga idadauluan ni Municipal Fire Marshall Erwin Saludes ti panangidonar ti lokal a gobierno ditoy ti fire truck nga adda iti ikutna tapno mairaman daytoy a maiyalokaran iti pondo nga aggapu iti BFP Central Office para iti maintenance daytoy.

Iti agdama, maysa a fire truck a naggapu iti BFP Central Office ken sabali a fire truck a nadawat ti lokal a gobierno ditoy ti imanmanehar ti BFP.

Kinuna ni Saludes a no agbalin a dua ti fire truck nga imanehar ti BFP ditoy, mabalin pay a maikkanda iti nayon a  bumbero.

Naipaima ti resolusion iti Konsehal Alexander Ayuyang, chairman ti komite peace and public order ken public safety, para iti pannakaadalna.#