Footer

BANNER NEWS: First of its kind iti Region 1 nga evacuation center, nabangon iti Ilocos Sur

Santa Catalina, Ilocos Sur Municipal Seal

SANTA CATALINA, Ilocos Sur – Binigbig ni Region 1 Office of the Civil Defense Director Melchito Castro ti nabangon ditoy nga ili nga evacuation center a kalawaan, katibkeran ken kamodernuan a pasdek.

Dayta ti impanakkel nga inrakurak ni Sta. Catalina Mayor Edgar Rapanut kadagiti kameng ti Ilocos Sur Integrated Press kabayatan ti naangay a Kapihan iti Amianan Media Forum.

Impakaammo ti Mayor a ti tallo-kadsaaran nga evacuation center a naipatakder iti sango ti munisipio, ket nadisenio a makabael a sumaranget iti intensity 8 a ginggined, ken super typhoon kas kapigsa ni Bagyo Yolanda a nangduprak idi iti Eastern Visayas idi 2013 a nangkettel ti agarup 6,000 a biag ken nangdadael iti binillion ti balorna a sanikua.

Nainaguraran ti evacuation center babaen kada Ilocos Sur Governor Ryan Singson, ken dagiti opisial ti OCD iti Region 1. Dinayaw dagiti sangaili ti naipatakder nga evacuation center iti Santa Catalina nga agbalin a modelo dagiti mabangonto pay a natalged a pasdek a pagkamangan dagiti tattao no adda didigra.  Kabaelan nga akomodaren ti evacuation center dagiti 200 a tattao nga agnaed iti komportable gapu ta kompleto kadagiti pasilidad kas ti comfort rooms, kosina, paglabaan, ken pribado a siled para kadagiti addaan iti asawa. Adda ti evacuation center iti apiring ti nalawa a municipal covered court nga extension no adu dagiti agpaing nga evacuees no adda tumaud a didigra. Impakaammo pay a nakasagana metten dagiti nasanay a kameng ti Municipal Disaster Risk Reduction Management Office nga agresponde no dumteng ti didigra iti ilida.

“Maibilang ti ilimi a napeggad no adda dagiti kalamidad nangruna kadagiti napigsa a bagyo ta naisaad ti Sta. Catalina iti igid ti baybay, ken nababbaba ngem iti sea level, agamakkami kadagiti naranggas nga aluyo wenno tidal surge a parnuayen dagiti napigsa a bagyo wenno ginggined, isu a rumbeng a kanayon a nakasaganakami,” kinuna ni Mayor Rapanut.

Inaklon ti Mayor nga ikagkagumaan ti Local Government Unit a kompletuen dagiti alikamen dagiti kameng ti MDRRMO, ken agal-allukoyda iti adu a volunteers manipud kadagiti amin a barangay tapno ad-adda pay a nakasaganada no adda dagiti tumaud a didigra iti ilida nangruna no kastoy a panawen dagiti napigsa a bagyo. Impalgakna pay ti pannakaingato ken pannakapalagda ti sea wall iti igid ti baybay ti Santa Catalina gapu iti kadakkel ken kapigsa dagiti dalluyon. Impakaammona nga agtultuloy ti pannakitimpuyogna kada Gov. Singson ken Congressman Deogracia Victor Savellano para iti pannakabangon ti coastal road manipud iti Vigan Airport agpa-Amianan sadiay Salomague Port, Cabugao tapno maituloyen ti proyekto.

Mainaig iti parikut ti illegal a droga, inaklon ti Mayor nga adda dagiti kailianna a natiltiliw kadagiti anti-illegal drugs operations, ken saanna a konsintiren dagiti agbasol. Impaganetgetna nga italeknan iti Philippine National Police ken Philippine Drug Enforcement Agency a mangisayangkat kadagiti operasion iti pannakadalus iti ilida iti illegal a droga.

Inrakurak pay ti Mayor nga ikagumaan ti administrasionna ti mangbirok iti dakdakkel a masapulan dagiti umili kalaksidan ti agrikultura wenno panagmula kadagiti natnateng a pakabigbigan ti Santa Catalina kas “vegetable bowl” iti Region 1. Inaklonna a bumasbassiten dagiti mayat nga aggamulo iti talon gapu ta nababa ti maganansia dagiti mannalon. Inrakurakna pay a pinadas metten dagiti sumagmamano a taga-Santa Catalina iti nagmula iti tabako ita a tawen, ngem adu pay dagiti nasken a sursuruen dagiti nagmula tapno agballigi ti tarigagay ti LGU a mangpaadu ti agmula iti tabako.

Inaklon ti Mayor a kayatna a padasen dagiti kailianna a mannalon ti agmula iti sabali a mula kas iti tabako tapno manayonan ti mapastrekda. Inlawlawagna nga uray daydi amana a Mayor Porfirio Rapanut, ti nangikagumaan ti panagmula kadagiti nagduduma a nateng iti ilida gapu ta saan a nasayaat a pagmulaan ti dagada iti tabako, ken nagtuladanen dagiti nagduduma nga ili ti panagmula ti nateng, ngem nasken a makidanggayda kadagiti pagteng iti agdama a panawen ta rumikoten ti kasasaad dagiti mannalon. Impalgakna pay ti plano ti LGU a mangpadur-as ti turismo iti ilida kas karruba ti Vigan City nga ar-araken dagiti adu a turista, ngem inaklonna a saanda pay a naan-anay a nakasagana gapu ta kurang pay dagiti pasilidad ken imprastraktura iti Santa Catalina ken limitado dagiti pondo ti LGU a maaramat kadagitoy a proyekto. (Eden Alviar)

, , , , , , ,