Fish production iti probinsia, agkurkurang

CABUGAO, Ilocos Sur – Agkurkurang ti fish production iti probinsia, segun iti fisheries division ti provincial agriculture office.

Segun ken ni Rogelio Ragunjan, mangidadaulo nasao a dibision, 80% laeng iti makunkunsumo nga ikan ti partuat iti agdama ti Ilocos Sur wenno 20% iti kasapulan nga ikan ti ang-angkatenda iti sabali a lugar kas iti Central Luzon ken Isabela.

Kanaig daytoy, inlungalong ti gobierno probinsial ti maysa a training  para kadagiti hatchery operators ken owners idi Oktubre 22-23 ditoy.

Karaman iti panagsanay iti umno a panagtaraken iti tilapia, paltat ken bangus ken iti panangmanehar iti fish cages.

Kinuna ni Ragunjan a kangrunaan a makaigapu iti panagkurang ti fingerlings ti bassit a produksion dagiti hatchery ditoy.

“Nupay adu ti bugi, adu ti matay gapu iti saan nga umno a pannakataripatoda isu’t gapuna a masapul ti naan-anay a panagsanay,” innayon ni Ragunjan.

Kinuna met ni Gov. Deogracias Victor Savellano a rumbeng laeng a mapasayaat ti benneg ti fisheries iti probinsia tapno maaddaan iti kanayonan a pamastrekan dagiti umili aglalo kadagiti adda iti coastal area ken asideg kadagiti inland waters. 

Kinuna ti gobernador a dakkel ti maaramidan ti  pannakapaadda iti umdas a suplay ti ikan iti pannakapukaw ti kinakurapay ken malnutrision a mangitunda iti napigsa nga ekonomia iti probinsia.

“Kasapulan a maasa ken manayonan ti ammoda dagiti adda iti fishery sector iti panagtaraken iti ikan. Rumbeng ngarud nga interesadotayo amin tapno adda pagbanagan dagiti panagsanay nga ituyang ti gobierno,” inyunay-unay ti gobernador.

Kinuna ni Savellano a masapul a dagiti taga-Ilocos Sur ti mangtaraken kadagiti bugi ken fingerlings a saan ketdi a mapanda ilako iti kabangibang a probinsia.

“Maysa a karit kadatayo amin daytoy. Sisasagana ti PGIS a makicounterpart iti 50-50 kadagiti ili a mayat a maaddaan iti municipal hatchery,” kinuna ni Savellano.#