Aplikasion iti Fisheries Scholarship para kadagiti katutubo ti Rehion 1 agpatingga no Okt. 15

VIGAN CITY — Agpatingga no Oktobre 15 daytoy a tawen ti panagipila ti aplikasion para iti Fisheries Scholarship Program Nationwide Recruitment Examination para kadagiti kameng ti Indigenous Cultural Communities (ICCs) ken Indigenous Peoples (IPs) ti Rehion 1. Daytoy ket iwaywayat ti Fisheries Scholarship Program ti Bureau of Fisheries and Aquatic Resources Region 1 (BFAR1).

Kuna ni Nestor D. Domenden, regional director ti BFAR 1 a daytoy a Competitive Scholarship Examination ket para kadagiti estudiante ti rehion a mayat nga agadal iti uppat a tawen a BS Fisheries a mangrugi no Agosto 2020.

Masapul a maisumite dagiti aplikasion ken kumpleto a dokumento iti opisina ti Municipal Agriculturist wenno iti BFAR 1.

Dagiti ageksamen a makagun-od iti nangato a grado ket masapul met laeng a maipasada ti entrance examination ken agenrolda kadagiti unibersidad ken kolehio ti gobierno iti Rehion 1. Dagitoy ket Ilocos Sur Polytechnic State College – Narvacan Campus iti Narvacan, Ilocos Sur; Mariano Marcos State University (MMSU) iti Pias Sur, Currimao, Ilocos Norte; Don Mariano Marcos Memorial State University – College of Fisheries (DMMSU-CF) iti Ubagan, Santo Tomas, La Union; ken Pangasinan State University – Binmaley Campus (PSU-BC) iti Binmaley, Pangasinan.

Oktobre 15 met laeng ti maudi a panagited iti aplikasion para iti Fisherfolk Industry Leaders Grant (FILG) ken Fisherfolk Children Educational Grant (FCEG). Daytoy immuna ket para kadagiti estudiante ti sekundaria nga adda iti top 10 iti graduating class. Daytoy maikaddua ket para kadagiti nakalpas iti sekundaria nga annak dagiti nakarehistro a mangngalap, wenno dagiti agay-aywan kaniada ket rehistrado a mangngalap.

Para iti ad-adu pay nga inpormasion, kontaken da May Ann L. Maningding ken Michael D. Laron iti telepono (072) 242-1559, 0917-832-1117, 0916-888-3184 wenno bisitaen ti website a https://www.bfar.da.gov.ph.