SANTA LUCIA, Ilocos Sur – Nagreklamo ti maysa a floor manager ti maysa a beerhouse iti Candon City gapu iti mapapati a panangrames kenkuana ti maysa a lalaki idiay barangay Barangobong iti daytoy nga ili.
Iti pulongna iti polis, kinuna ti biktima a nailinged ti kinasiasinona iti nagan a Luzviminda, 33, taga-Baliwag, Bulacan ngem temporario nga agnanaed iti barangay San Juan, Candon City, floor manager iti maysa a beerhouse iti Candon City, a napasamak ti mapapati a panagrames iti Barangay Barangobong ditoy.
Nainaganan ti suspetsa a maysa a Bong Garcia, residente iti barangay Sapang, Santa Lucia.
Segun iti inisial a panagpalutpot ti polis, agarup alas kuatro ti parbangon idi napan naturog ti biktima iti unit ti boyfriendna iti ACL Compound iti barangay Barangobong.
Mapapati a napuotan ti biktima nga adda nakarabaw kenkuana ken mangramramas iti barukongna ngem binaybay-anna daytoy iti panangipagarupna a ti boyprenna.
Kinuna ti biktima nga idi agmulagat, naduktalanna a saan met gayam a ti boyprenna ti nangrabaw kenkuana ket immukas sana tinungpa ti suspetsa. Ngem dinanog ti lalaki ti tianna sana imparabaw ti pungan iti rupana.
Kinuna ti biktima a nagpakpakaasi iti suspetsa agingga a pinalukayan met laeng ti lalaki.
Idi nakaruar ti lalaki, ditan a nagikkis a nagpaarayat ti biktima.
Agtultuloy ti imbestigasion ti pulisia.
