Floor price ti tabako, naipangato iti P5 kada kilo

SINAIT, Ilocos Sur – Naipangato ti floor price ti tabako iti P5 kada kilo para iti masungad a tobacco season, daytoy ti impakaammo ti maysa a lider dagiti agmulmula iti tabako ditoy nga ili.

Kinuna ni Konsehal Bernard Vicente a napagnunummuanan bayat ti tripartite conference a naangay itay nabiit iti National Tobacco Administration Central Office, Quezon City a maipangato ti floor price ti Class AA iti P6 kada kilo idinto a P5 kada kilo kadagiti nababbaba a klase ti tabako.

Kinuna ni Vicente nga agbalinen a P72 kada kilo ti floor price ti tabako a Class AA iti masungad a panagtatabako.

Maipalagip a dimmanon iti P72 kada kilo ti pinaggatang dagiti traders iti bulong ti tabako a Class AA iti napalabas a panagtatabako.

Dagiti sumaganad ti kabarbaro a floor price dagiti dadduma pay a klase ti tabako: Class A – P69/kilo (manipud iti P64.kilo); Class B – P67/kilo (manipud iti P62); Class C – P65/kilo (manipud iti P60); Class D – P60/kilo (manipud iti P55); Class E – P59/kilo (manipud iti P54).

Ngimmato met ti floor price ti palaspas iti P55/kilo manipud iti P50 idi napalabas a panagtatabako.

Tunggal dua a tawen a maangay ti tripartite conference tapno matinong ti floor price ti tabako.

Iti daytoy a kumperensia dagiti mannalon ken dagiti traders ken manufacturers, awan ti naawis a politiko wenno opisial ti probinsia ken ili.#