Florida bus, nakursonadaan a binato menor de edad

STA. MARIA, Ilocos Sur – Maysa a pasahero ti nadunor gapu ta nakursonadaan a binato ti maysa a menor de edad ti bus a naglugananna bayat ti panagdaliasat daytoy iti Barangay Suso, ditoy nga ili idi tengnga ti rabii ti Hulio 30.

Naitaray iti Central District Hospital iti Narvacan, Ilocos Sur ni Lolita Ancres y Quitola, 58, ken residente iti Barangay 30, Laoag City, Ilocos Norte gapu iti pannakabato ti ulona.

Nabigbig ti menor de edad a nangbato iti Florida Bus a ni Dione Frank Ayson y Cerenas, 15, first year high school student iti Santiago National High School ken residente iti Barangay Cappacappa, San Esteban, Ilocos Sur.

Naammuan iti inbestigasion dagiti polis nga agdaldaliasat ti bus a minaneho ni Diosdado Pablo y Acebedo, 39, naasawaan ken residente iti barangay Sto. Nino, Claveria Cagayan iti national highway a sakup ti Barangay Suso idi mapapati a binato ni Ayson ti bus a nangburak iti sarming iti makannawan a paset ti maikadua iti kalikudan a tawa ken nakatiruan ti ulo ni Andres.

Nabigbig dagiti kadua ti suspek a padana a menor de edad a da Edison Castro, 16, second year high school, ken residente iti Barangay Cappacappa, San Esteban ken ni Jayvee Fadri y Garcia, 17, second year high school ken residente iti Zone III, Barangay Suso, Sta. Maria.

Saan a nailanad iti blotter no apay nga adda pay laeng nga agwalangwalang dagiti menor de edad iti kalsada iti dayta a disoras ti rabii.#