Food for the School, nairugi iti Cabugao

CABUGAO, Ilocos Sur – Nawarasan iti bagas idi Marso 7 dagiti amin a Pre-school ken Grade I pupils ti sibubukel a distrito ditoy nga ili kas paset ti programa ti Department of Education a Food for the School.

Segun ken ni District Supervisor Rudy Vallejo, iwarasda ti sag-sangakilo a bagas kada ubing iti uneg ti 35 nga aldaw kas gagem ti DepEd a mapaksiat ti malnutrision kadagiti ubbing nga agbasbasa iti Cabugao District.

Kanaig daytoy, inyunay-unay ni Mayor DioCaesar Suero ti pannakapaadda iti sustainability kadagiti kakastoy a programa tapno nasayaat ti resultana.

Magun-od daytoy babaen ti panangited ti provincial government, LGU, agduduma nga ahensia ken NGOs iti counterpart a tulong para iti panagkikinnamayyetda tapno  ad-adu ti magapuananda.

Kabayatanna, indagadag ni Gob. Deogracias Victor Savellano ti  pannakaibasuran ti junk foods kadagiti pagadalan ken itandudo ti DepEd ti panaglako dagiti school canteen kadagiti lokal a produkto ti tunggal ili tapno maragpat ti probinsia ti 0%  malnutrision.(Mancielito S. Tacadena/NBN Vigan)