Food house, natakawan

VIGAN CITY – Natakawan ti maysa a food house a masarakan iti tiendaan publiko ditoy siudad idi rabii ti Enero 10.

Iti report a dimmanon iti police station ditoy, natakaw ti wallet ni Kathleen Ann Fernandez iti uneg ti storage ti Shim’s Food House a masarakan iti Vigan City public market a kukua ken imatonan ni Reslilia Que y Fernandez, 39, naasawaan, ken residente iti Barangay Aggay, Bantay, Ilocos Sur.

Nainaganan ti suspek a ni Michael Baloroso y Guanzon, 21, baro, ken residente iti Barangay 1 ditoy siudad.

Segun iti panagimbestiga dagiti polis, mapapati nga iti di natulbekan a roll-up door ti simrekan ni Baloroso nga immuneg iti storage sana intaray ti wallet ni Fernandez.

Intudo ti maysa a saksi a maysa a Jaime Quinto y Parma, 29, naasawaan ken residente iti Barangay IV, Vigan City, ti suspek a nangtakaw iti wallet ni Fernandez.

Nangiwayat dagiti polis iti follow-up operation para iti pannakatiliw ti suspek ngem didan nasapulan daytoy.#