: Food terminal, naipasdek iti upland municipality | Tawid News Magazine - Weekly Ilocos News 📰

Food terminal, naipasdek iti upland municipality

DEL PILAR, Ilocos Sur – Babaen ti panangpondo ti Department of Agriculture Regional Field Office I, naipasdek ti maysa a food terminal iti Poblacion ditoy nga ili a pagibagsakan kadagiti produkto daytoy nga ili.

Nailukat ti nasao a proyekto idi Marso 30 babaen ti panangidaulo da DA Research and Development Chief Ed Gonzales ken Mayor Luz Villalobos ken sinaksian dagiti representante ti National Food Authority, Bureau of Fisheries and Aquatic Resources, provincial government ti Ilocos Sur ken dagiti residente ditoy.

Naipaima pay iti daytoy nga aldaw iti lokal a gobierno ditoy ti maysa a freezer, pagkiluan, plastic crates ken tseke nga aggatad iti P270,000 kas pangrugian a capital.

Tarawidwidan ti lokal a gobierno daytoy a proyekto a pakaipanan dagiti produkto ti talon ken pakaidulinan dagiti nadaras a madadael a produkto tapno agtalinaed ti kinapreskoda iti napapaut a tiempo agingga a maisalogda a mailako iti sentro.

Pinagyamanan ni Villalobos ti pannakaipasdek ti food terminal idinto a kinunana kasapulan unay daytoy iti ilida nga adayo iti sentro ken narigat a makababa dagiti umili iti tiempo ti tudtudo.#