Footer

Ford Everest, motorsiklo, karaman iti aksidente

BANTAY, Ilocos Sur – Nadunor ti drayber agraman ti kaduana gapu iti panangdungpar ti naglugananda a motorsiklo iti maysa a Ford Everest iti akindaya a dike ditoy.

Nasugatan da Romeo Cañete, 18, baro, residente iti Salindeg, Vigan City, ken ti kinaluganna ket naitarayda iti Polyclinic Hospital tapno maagasanda.

Segun iti inisial nga inbestigasion ti polis, sarsarunuen ti motorsiklo ti Ford Everest a minaneho ni April Que, 19, balasang, residente iti Guimod, ditoy nga ili, idi kellaat a nagpreno ti kotse agsipud iti panagsardeng ti traysikel a sarsarunuenna.

Saan a napakadaan ti biktima ti panagsardeng ti lugan iti sangona ket nadungparna ti kutit daytoy a puon ti nakadundunoranda iti kaduana.

Nadadael ti sungo ti motorsiklo ken ti kutit ti Ford Everest.#