Ford Fierra, transit mixer, head on collision; 3 pasahero, naiyospital

CERVANTES, Ilocos Sur – Nagdinnungpar ti dua a lugan iti Catcateng Bridge sadiay Barangay Concepcion, ditoy nga ili idi bigat ti Nobiembre 30 gapu ta mapapati a kimmaut ti maysa a lugan iti linia ti sabali.

Iti report manipud iti polis, idi agarup 8:30 ti bigat ti nadakamat a petsa, agpalaud a direksion ti Ford Fierra a minaneho ni Osmundo Galut y Dacutan, 35, naasawaan, ken residente ti Quirino, Ilocos Sur idi nakidinnungpar iti Transit Mixer a minaneho ti maysa nga Edward Galao y Wagi, residente iti Barangay Namitpit, Quirino, Ilocos Sur.

Mapapati a kimmaut ti Transit Mixer iti linia ti Ford Fierra a puon ti nagdungparan ti dua a lugan.

Gapu iti daytoy, naitaray dagiti naglugan iti Ford Fierra a nabigbig a da Dexter Dalay-on y Ayomeng, Rico Dang-ey y Ponlito ken Angel Valdez y Ayandag, agpada a taga-Quirino, iti Bessang Pass Memorial Hospital para iti pannakataming dagiti sugatda.

Naglibas ti drayber ti Transit Mixer sakbay a nakadanon dagiti polis iti nakapasamakan ti aksidente sa simmuko iti Quirino police station.

Segun iti report, awan ti plaka ti Transit Mixer a mapapati a kukua ti maysa a mayor iti maysa nga upland municipality.#