Footer

Forum ti kandidato para presidente ti UNP, naangay

By Julie Beth Balite

VIGAN CITY – Naangay ti candidates’ forum a nakipartisiparan dagiti siam nga agtarigagay a para presidente ti University of Northern Philippines ditoy idi Hulio 25.

Iti nasao a forum, imbaskag dagiti kandidato dagiti kualipikasionda ken dagiti bisionda mainaig iti pagadalan no isuda ti mapili a presidente.

Karaman dagiti kandidato ti innem nga insider a pakaibilangan da Dr. Ferdinand Lamarca, dati a vice president for planning, research and extension; Dr. Gilbert Arce, dati a dean ti office of student affairs; Dr. Ceferina Ambre, dati a dean ti graduate school; Dr. Ramon Razote, director ti office of production and auxillary services ken dati a dean ti College of Business Administration and Accountancy; Dr. Ocarna Figuerres, dean ti college of teacher education; ken Dr. Alfredo Rabena, dati a director ti research and development ken tallo nga outsider a pakaibilangan da Dr. Enrie Mendoza, dati a presidential assistant for Region I, Office of the President of the Philippines; Dr. Honorio Buccat, DMMMSU vice president for academic affairs; ken Dr. Medardo de Guzman, dati a hepe ti polis ken part time instructor iti North Luzon Philippines State College (dati a UNP Candon).

Manamnama a mapili iti mabiit ti baro a presidente a mangsukat ken ni Dr. Lauro Tacbas a nagtakem a pangulo ti unibersidad iti sangapulo ket tallo a tawen.

Naipasdek ti UNP babaen ti maysa a linteg a pinutar daydi Cong. Floro Crisologo, kaingungot ni dati a Gov. Carmeling Pichay Crisologo ken ina ni First District, Quezon City Congressman Vincent “Bingbong”.#