Fresh plasma freezer, naidonar

VIGAN CITY – Maysa a ramit a mangpatalinaed iti kinapresko ti dara ti naited iti Philippine Red Cross ditoy itay nabiit.

Kinuna ni Vigan PRC Officer in Charge Raymond Chan a babaen ti machine grant ti Rotary International, maysa a Fresh Frozen Plasma Freezer ti naited iti opisinana.

Naited ti nasao a makina iti PRC ditoy babaen ti Rotary Club of Vigan District No. 3790 ken ti Rotary Club of Stockton District No. 5220, nga agserbi a  pakaidulinan iti fresh frozen plasma a maaramat para kadagiti emerhensia a kasapulan.

Kinuna ni Chan nga adda met ramit ti PRC ditoy a Fresh Frozen Plasma Freezer ngem saanen a mabalin ket dakkel a katulonganda daytoy naited kadakuada nangruna iti panagraira ti dengue a kasapulan dagiti presko a plasma.

Kinuna ni Chan nga agtultuloy nga agbirbirokda kadagiti sponsor a mangipaay kadagiti kasapulanda iti opisina.#