FRIENDZONE

Imbiit ni Jobert M. Pacnis

DUMA itan dagiti ubbing,” dayta ti sangkakuna dagiti kaduak a mannursuro ditoy Cabaybay National High School a nadanonak. Kaperpermanentek ngamin idi napan a tawen. Naladaw ti pannakastrekko ta sabali a kurso ti immuna nga inleppasko.

Kunam pay, mam,” kunaen met dagiti dadduma. “Idi panawentayo, maysa laeng a perreng wenno kusilap kenka ti titsermo, agkutitemkan. Ngem ita… ayna, umingardan!”

Nagarawda pay itan aglalo dagiti babbai… awanen daydi kinaemma idi panawentayo.”

Hustoka dita, mare. Gapu dayta iti selpon nga adda kadakuada.”

Kitaek man, kunak idi iti isipko.

NAGUNI ti buzzer a mangipasimudaag a nalpasen ti maikadua a period iti agsapa. Breaktime ti sumaruno. Dagus a nagpakadaak kadagiti adalak iti Grade 11. Applied Economics ti klasek kadakuada. Uppat nga oras iti makalawas. Aldaw ti Mierkoles ti bakantemi.

Nabuak dagiti estudiantemi. Agsasarutsotda a napan kadagiti tallo a kantina iti ikub ti pagadalan. Addaakon iti corridor idi agtimek ni Railyn, estudiantek iti Applied Eco, iti likudak.

Intan agmerienda, sir,” kinunana. Nakasamsam-it ti isemna nga immabay a binagayan ti ala-Julian San Jose a panagruprupana. Arigna agkatayagkami iti tayagko a 5’3”. Napudaw ken kasla saanna a disisiete laeng. Nakabalbalasang!

Baka maibus ti allowance-mo no umayak,” kinunak.

Hindi, sir,” impallilitna.

Saanen, baka makabasolak pay.”

Ita laeng met nga agawisak, sir.”

Baka ania ti sawen dagiti makakita…”

Adda kad’ dakesna, sir?”

Awan… ngem saanta a maliklikan ti saosao dagiti adda iti aglawlaw.”

Hmp…” limmidem ti rupana. “Sige ngarud, sir.” Ket nagturongen iti kantina.

Nagturongak metten iti office-mi.

Bro,” kinuna ni Sabas, ti kataebko a guardia ti pagadalan, a nasabatko iti playground, “dim’ sa met pinagustuan ‘diay bebeng?”

Bro, dayta ti nakairuaman a pangawagna kaniak no awan sabali a makangkangngeg. Nagkaadalankami ngamin idi iti hayskul. Nagenrol iti Agrikultura ngem saanna a nalpas ti umuna a semestrena ta sabali ti nasumokna. Dayta laeng agar-arem ken agpaarem kadagiti beki idi tapno laeng agkakuarta. Naladawen idi agbalaw.

Bebeng, dayta ti awagna kadagiti babbai wenno tsiks kadagiti kanto-boy.

Iti panagpamilia ni Sabas, isu pay laeng ti pannakautobna dagiti madi nga inar-aramidna. Isu nga inkagumaanna ti nag-training idi addan ti bungada nga agassawa. Ket innala ti pagadalanmi a guardia.

Nasiputka a talaga, bro,” kinunak.

Ayna, bro, siak la ti kas kenka ket tuktokek ti umasideg nga irik,” inggarikgikna.

Ti la ibagbagam.”

Ayna, bro, malakayankan a baro. Natnagkan iti kalendario a kunada. Ken maysa, pagdanagam ket disiotsonan sa metten?” Ammok lattan a ni Railyn ti kayatna a sawen.

Correction… agdisiotsona pay laeng.”

Sulasu daytan!”

Naalas a kitaen…”

Ti agkarelasion a titser ken estudiante?” insippawna. “Uhu, awan daytan! Nagadu dita nga am-ammok a nagkatuloyan. Ammok a di palimed kenka dayta.”

Uray pay… naalas a kitaen.”

Malakayanka no kastam laeng.”

Pinampanunotko dayta a kinuna ni klasmeyt. Ngem apay, lakay kad’ la unayen ta apagtinnagna iti kalendario? Ni ngarud Manong Ferdie a kaarrubami, agmenoposen, no babai koma, idi agbalaw. Ngem nakaasawa met pay laeng. Ken nakaputot pay iti lima—ta pinagsasaganadna ni baketna nga agtawen laeng idi iti 38.

Aklonek, adu dagiti madmadlawko nga ubbing, aglalo dagiti addan iti Grado 9 agpangato ti mangipadlaw la unay iti panagkursonadada kaniak. Bulataw, mabalin a kunaen dagiti dadduma ngem dayta ti agpayso.

Nakakadkadlaw ti gunggunayda. Adda dita dagiti mangipan lattan iti merienda wenno ania man a saramsam iti rabaw ti lamisaanko. No saan, masida (maysa ni Railyn kadakuada). Gapu ta kaaduan kadagiti ubbingmi ti agnaed iti igid ti karayan, no di pasayan wenno kaggo, rasa ti ipasirokda lattan iti lamisaanko.

No met masarunodak iti playground, kamakamendak nga umaklili pamrayanda mangala kadagiti gargaretko. Ipigendak ket nakapaspasigda a kaskami la agbabarkada.

Kasla ama ti pangibilbilanganda kaniak, bro,” sangkakunak ken ni Sabas no kasta a kantiawannak.

Nakapuyka ketdi, bro,” kunaenna met.

Husto met ketdi. Baroak, kayatna a sawen, libreak. Ngem kas maysa a mannursuro, adda dayta paset ti kultura a nagalas man a kitaen a makirelasion iti ubing wenno estudiantena. Ngem kas kuna met laeng ni Sabas, a pudno met, adu dagiti mannursuro a nakaasawa iti adalanna—nga idi damo adu ti saosao ti aglawlaw. Ngem iti panaglabas ti panawen, kas met laeng kadagiti nabara nga isyu iti pagilian, maitanem ken maawaten ti sosiedad ti pasamak—nga itan kasla normal payen a banag.

Ngem sabagay, kas nakuna met laeng ti maysa a mannurat: O, pag-ibig na makapangyarihan, hahamakin ang lahat masunod ka lamang.

Ethics isyu, dayta ngamin ti kadakkelan a sanguen ti kas kaniak no maipasungalngal kadagita a paspasamak. Ngem asino ngamin, aya, ti makaigawid ti riknana no dinalapusen ti ayat? Ayat, saan a gartem laeng.

Ket aklonek, kas normal a parsua, saan a diak met nakarikna iti panagraem kadagiti nagbalinen, ken agdama nga ubbingko, a nangipadlaw/mangipadlaw la unay ti riknada kaniak. Ngem gapu ngarud kadayta nga “ethics issue,” awan ti maaramidak no diak leplepan ti sagpaminsan nga agragut a rikna.

UG-UGGOTAK dagiti mulak a kamotit iti bukodko a garden iti lauden ti stage kadayta a pasado alas kuatro ti malem. Manarimaan met ti panagdalus dagiti ubbing kadagiti area-da sakbay nga agawidda.

Nagimas daytan, sir,” diak napupuotan ti yaasideg ni Railyn. Bitbitna ti pagbasuraanda. Ammok lattan a naggapu a nagiballeng iti compost pit iti lauden ti alad ti gardenko.

Awan ngamin igatang ti sidaen isu nga aguggotak man,” kinunak.

Sika pay ti awan igatangna, sir?” inyisemna. “Diak mamati.” Immabay ket nagadiwara ti banglona.

A nakariingan ti riknak.

Diak napuotan ti simmaruno nga inaramidna. “Siakon ti mangiggem kadayta, sir,” kinunana. Innalana ti nauggotko ket iti panagpasigna, naidekket ti barukongna iti makanawan a takiagko.

Ad-addan a nariing ti riknak.

Sir…” aglalanay dagiti matana a mangtuktukod iti kinataok. Kellaat a sinibetnak. Inyasidegna ti rupana iti rupak.

Napataliawak kabayatan nga inlisik iti apagapaman. Pagpiaanna ta awan ti matatao. Sabagay, nailingedkami kadagiti kabatiti nga impalikmutko kadagiti kamotit.

Railyn… please, pumanawkan…” diak ammo no naawatanna ta mamigerger metten ti bosesko. Inakkalko ti imana iti sibetko.

Sir, mahal kita… Saankon a kabaelan nga ilimed ti riknak kenka,” imperrengna.

Saan a rumbeng daytoy, Lyn,” kinunak.

Gapu ta titserka ket estudiantenak laeng?” awanen ti “sir” a pangawagna kaniak. Serioso ti rupana. “Inayatkan idi pay laeng. Malaksid iti kinalaingmo nga agisuro, naanus ken nagagetka pay. Makitkitak ti panaggargardenmo nga agmaymaysa no kasta a bakantem imbes a mapan agpupok iti bakante a kuarto tapno agsusop iti sigarilio.” Dagiti la ketdi kamaestroak ti kayatna a sawen. “Ti kas kenka ti kayatko a pagpasagan, sir… Manmanon dagiti kas kenka nga awan bisiona,” intuloyna.

Pinerrengko. Anian a kapanunotan. Kasla addan iti husto nga edad. “Dumngegka, Lyn,” inseriosok. “Dika mababalaw kadayta riknam, karbengam dayta. Ngem ubingka pay, adu pay ti agbaliw iti panagkitam iti maysa a banag. Wen, adu pay ti pagbaliwan ti amin…” napaangesak iti nauneg ta kasla sultopennak nga alinuno ti nabagas a panangperrengna met kaniak. “Agbasaka ketdi. Ipamaysam ti arapaapmo. Ania ti ammota no iti masungad nga aldaw, datanto met laeng ti pagtugmoken ti gasat? Maawatannak koma. Diak kayat a siak ti pakarakrakan ti masakbayam… ti arapaap dagiti nagannak kenka.”

Awan timtimekna a nangpidut iti indissona itay a pagbasuraanda. Naluyaanak iti panagarubos dagiti luana. Tinallikudannak ket napanen.

Railyn, saan pay nga ita ti umno a panawen, nakunak laengen iti isipko.#