Gabriela Silang GH, naadaptar nga ospital dagiti soldado

VIGAN CITY-  Naadaptar ti maysa a ward ti Gabriela Silang General Hospital ditoy a pakaagasan dagiti soldadoken dagiti kameng ti pamiliada babaen ti katulagan a nagpinnirmaan ti  gobierno probinsial ken ti Armed Forces of the Philippines itay nabiit.

Imbagian ni Gov. Deogracias Victor Savellano ti provincial government idinto nga insuno ni Col. Pompeyo Limbo ti 503rd Infantry Brigade ni AFP Chief of Staff Hermogenes Esperon Jr. iti biang ti AFP a nagpirma iti memorandum of agreement on hospitalization and medical services to bonafide members of  the AFP and their legal dependents iti simple a seremonia a naangay iti Gabriela Silang General Hospital itoy a siudad itay Marso 20.

Sinaksian da Provincial Health Officer Carmeliza Singson ken ni Dra. Lorna Esperon, kaingungot ti AFP chief of staff.

Kinuna ni Savellano a dakkel a tulong, saan laeng kadagiti soldado no di pay dagiti agindeg iti Ilocos Sur ti panangadaptar ti AFP iti maysa a ward iti GSGH ken panangipaayda iti agduduma a hospital equipments.

Kinuna met ni Dra.Lorna Esperon a rugin ti ad-adu pay a panagtinnulong ti AFP ken provincial health office ti Ilocos Sur ti napirmaan a MOA.

“Adda iti Isabela ti kaasitgan a military hospital ket adayo unay no ibiahe pay sadiay ti masakit a soldado isu a nangadaptarkami laengen iti maysa a ward iti public hospital ditoy tapno adda usaren dagiti soldado ken uray payen dagiti umili,” palawag ni Esperon.

Nangipaay pay ti doktora iti P10,000 para iti pannakagatang dagiti electric fans iti pediatric ward ti GSGH.(Mancielito S. Tacadena/NBN Vigan)