Editorial: Gagangay nga estudiante ngem saan a gagangay a babai | Tawid News Magazine - Weekly Ilocos News 📰

Gagangay nga estudiante ngem saan a gagangay a babai

Ti estoria ti maysa a balasang nga awanan pagtaengan ken iti baet dagiti dadakkel a balangan, nagturpos itay nabiit iti sekundaria ti mangpaneknek a saan a sawir ti kinapanglaw ken dagiti lapped iti nasiit a dalan no adda kinatibker ti pakinakem ken determinasion nga umalut-ot manipud iti kinakurapay.

Idi Marso 30, naggraduar iti Manila High School ni Rodali Mosende, 19. Gagangay nga estudiante a nagturpos iti nasao a pagadalan. Kinapudnona, kas kuna dagiti titserna, gagangay laeng nga estudiante ni Rodali ngem nairuarna amin nga asignaturana. Managbabain pay.

Wen, gagangay laeng nga estudiante ni Rodali, ngem saan a gagangay a babai agsipud ta addaan iti ingget tibker a panunot, ken di marubsi a tarigagay a mangbalbaliw iti panagbiagna.

Ken ni Rodali, napnuan kaipapanan daytoy a panagturposna agsipud ta naiyalud-odna ti panagbasana iti sekundaria iti baet dagiti rigat ken balangan iti panagbasana.

No maammuam ti kasasaad iti biag da Rodali, dimo la ketdi magawidan ti di agraem iti daytoy a balasang. Ngamin, anak laeng ti maysa nga aglaklako iti bangketa, iti metten bangketa ti pagturoganda ta awan ti balayda, kaduana ti inana, ti kabsatna, ken maysa a gayyemna a pinagtalaw ti pamiliana.

Iti payen bangketa ti pagbasaan ni Rodali kadagiti leksionna, kaadduanna iti kasipngetan ta awan ti silawda ken awan lamisaanna. Nariwet pay laeng, bumangonen tapno agsakdo iti danum ken tapno makadigos a masapa agsipud ta awan ti pagdigosanda.

Iti sabali laeng a babai, nagsardeng koman nga agbasa ket posible pay a naiyaw-awan iti dalan, kas iti kabsatna a dinan kayat ti agbasa. Ngem saan nga intulok ni Rodali a rumukma iti rigatna a mangisakad iti panagbasana. Kayatna ti makaadal, ti makasursuro.

Pagyamananna ta sisusuportar kenkuana ti inana, uray kasano ti rigatda iti inaldaw a panagbiagda. Isu pay ketdi ti nangdagdag ken ni Rodali a tumipon iti sangguniang kabataan tapno saan a maibarkada kadagiti naiyaw-awan nga agtutubo.

Iti panagturpos ni Rodali iti sekundaria, adu pay ti daliasatenna sakbay a magtengna ti arapaapna iti masakbayan. Ngem ti importante, narugiannan a nausatan ti daliasatenna a dalan.  Mangnamnamakami a natibker latta ti yaaddangna nga agturong iti balligi gapu iti impamatmatna a kinatibker ti pakinakemna ken iti nasged a tarigagayna nga umalut-ot iti kinakurapay a nariinganna iti biag.

Agbiag dagiti kas kenka, Rodali!#