Footer

Gakat a mamagbalin Cabugao nga Ecozone, awan rason a di maaprobaran iti Senado – DV

CABUGAO, Ilocos Sur – Nupay adda panagamak dagiti dadaulo dagiti nadumaduma nga ahensia ti turay, awan ti makita a rason dagiti opisial iti probinsia a di maaprobaran ti gakat a mamagbalin daytoy nga ili nga economic zone.

Daytoy ti inyebkas ni Vice Gov. Deogracias Victor “DV” Savellano idinto nga inyunay-unayna a no makapasa ti gakat, agdur-as saan laeng daytoy nga ili ken kabangibangna no di ti intero a probinsia agsipud iti isasangpet dagiti dadakkel a negosio ken umadu ti panggedan dagiti residente ditoy.

Kinuna ni Savellano a kaadduanna kadagiti senador nga adda iti komite a nangisayangkat iti public hearing ket adda pakainaiganna iti ecozone idinto a ni Roxas a chairman ti komite, ti autor ti counterpart a gakat ni Baterina iti Senado.

Immatendar itay lawasna da Vice Governor Savellano ken ni Bokal Jerry Singson iti Senado tapno ibagianda ti probinsia mainaig iti public hearing ti gakat a mamagbalin ti Cabugao nga economic zone.

Ni Dip. Salacnib Baterina ti autor ti nasao a gakat a naaprobaran iti Kamara.

“…Adda dagiti apprehension dagiti nadumaduma nga ahensia ti gobierno,” kinuna ti bise gobernador ket dinakamatna ti amak dagitoy nga iseserrek ti panagipuslit iti puerto ti Salomague ken dagiti produkto a mangdadael iti presio dagiti produktotayo ken ti pannakadadael ti national resources iti pakaipasdekan ti freeport.

“Ngem dependento iti panangipataray ti Dept. of Finance ken Bureau of Customs, ken nadumaduma nga ahensia nga adda pakainaiganna iti free port,” kinuna ni Savellano sana innayon a no nainget ti implementasion ken masurot ti pannakasalaknib dagiti natural resources, awan makitada a rason a saan a maaprobaran ti nasao a gakat.

Kinuna ni Savellano a maiyarig iti negosio ti free port a kalpasan ti pannakaipasdekna, kasapulan iti agresibo a marketing agsipud iti napigsa a kompetision.

“Negosio ngamin dayta… Dagiti locators, agbirokda met iti dakdakkel a maganansiada,” kinuna ni Savellano.

Impatalged ni Savellano a no maipasdek dagiti negosio ditoy, kitaendanto nga opisial ti probinsia a prioridad a maala nga agtrabaho dagiti residente iti probinsia ken maikkanda iti maiyannatup a sueldo ken benepisio.

Imballakad ni Savellano nga iti pannakaipasdek ti free port iti Cabugao, panunoten metten dagiti agtutubo ti kurso nga alaenda a maiyannatup kadagiti pagkasapulan ti ecozone.

Ti Salomague port ti maysa kadagiti binisita a proyekto ni Presidential Staff Management Sek. Arturo Yap itay nabiit.

Kinuna ni Gov. Luis “Chavit” Singson a no naan-anay a madevelop ti Salomague port, mangisangbay iti dakkel a pamastrekan iti probinsia ken panggedan kadagiti kailianna.

“Uray saandanton a mapan agtrabaho iti ballasiw-taaw, umdasen dagiti maipasdek a panggedan a kasapulan dagiti agipuonan iti negosio iti Salomague port,” kinuna pay ni Singson.