Footer

Gakat a mamagbalin ti Salomague Port nga ecozone, impila ni Cong. Ronald Singson

VIGAN CITY – Gapu iti saanna nga ilulusot iti napalabas a Kongreso, naipila manen iti Kamara ti gakat a mamagbalin ti Salomague Port nga economic zone.

Kinuna ni Cong. Ronald V. Singson nga impilana manen ti gakat ni dati a Diputado Salacnib Baterina gapu ta saan a nakalusot a nagbalin a linteg iti napalabas a 13th Congress.

Kinuna ni Singson nga impilana manen ti gakat agsipud ta kasapulan a maipadaras ti panagbalin ti panagbalin nga economic zone ti Salomague Port tapno maawis dagiti ganggannaet a negosiante nga agipasdek iti negosioda ditoy probinsia.

Nupay naaprobaran ti gakat iti Kamara ken Senado bayat ti naudi a Kongreso, saan a natuloy ti deliberasion iti bicameral conference committee gapu ta nasakaw ti eleksion idi Mayo 14 daytoy a tawen.

Impalgak ni Singson nga iti panangipilana iti gakat,   adda suporta da Pres. Arroyo ken House Speaker Jose de Venecia para iti panagbalin ti Salomague Port kas economic zone.

Ti panagbalin ti Salomague Port nga economic zone ti maysa kadagiti prioridad a proyekto ni dati a Gov. Luis “Chavit’ Singson gapu iti sirmatana a no maaprobaran ti gakat, maipasdek iti puerto dagiti paktoria ken negosio a mangisangbay kadagiti panggedan ket saanton a kasapulan pay a mapan mangged dagiti residente ditoy probinsia iti sabali a pagilian.

Kadagiti napalabas nga interbiona iti media, kinuna ti dati a gobernador nga iti panagbalin ti China a superpower, aglippias dagiti pagimbagan iti probinsia gapu iti kaasideg ti Salomague Port iti nasao a pagilian.

Itay nabiit, bimmisita ni Chinese Ambassador Song Tao ditoy probinsia ket impatalgedna ti nair-irut a panaglangen ti China ken ti Ilocos Sur kalpasan ti pannakapirma ti letter of intent iti nagbaetan ti Hunan, China ken ti Pilipinas bayat ti ibibisita ni Gov. Deogracias Victor Savellano iti nasao a pagilian.

Ti Hunan ti maysa kadagiti kangrunaan a probinsia iti China nga agparpartuat iti sigarilio. Iti sabali a bangir, ti Ilocos Sur ti kadakkelan iti produksion iti Virginia a tabako iti Region I.#