Gakat a mamagbalin ti Salomague Port nga ecozone, tutokan ni Cong. Singson

VIGAN CITY – Impatalged ni Diputado Ronald Singson a tutokanna ti impilana a gakat a mamagbalin ti Salomague port nga  economic and freeport zone manipud iti Kamara agingga iti Senado tapno agbalin a naan-anay a linteg.

Itay Marso 25, inangay ti House committee on economic affairs ti consultation ken public forum mainaig iti nasao a gakat iti Cabugao, Ilocos Sur.

Kinuna ni Singson nga adda metten counterpart a gakat nga impila ni Sen. Miguel Zubiri iti Senado ken impanamnama ni Sen. Aquilino Pimentel iti itutulongna tapno maaprobaran daytoy a gakat.

Kinuna ni Singson a maiyataday ti panagbalin ti Salomague Port nga ecozone iti programa ni Pres. Gloria Macapagal-Arroyo a mangpabileg ken mangpapigsa kadagiti nadumaduma a rehion tapno saan a concentrated ti kapital iti Metro Manila.

Kinuna ti mangibagi iti First District ti Ilocos Sur a no maipasdek ti economic zone ken freeport authority iti Cabugao, “namnamaentayo nga adu nga investment ti aggapu iti ballasiw-taaw a mangbatir iti ekonomiatayo.”

Innayon ni Singson a no agbalinton nga ecozone ti Salomague port, adunto dagiti paktoria ken pabrika a maipasdek ditoy, maiyempleo dagiti adu a tattao ket saanto laengen a panagtalon ti pagsapulan dagiti umili ta addanton sumrekanda a trabaho.

Kinunana a maysa a pagsayaatan ti Salomague port ta natural cove daytoy a natalged a pagsangladan dagiti bapor uray iti panawen ti bagyo.

Kabayatanna, iti interbiona iti radio itay lawasna, kinuna ni dati a Gov. Luis “Chavit” Singson a “good as approved” ti gakat ti anakna iti Kamara idinto nga innayonna a “daytoy ti ur-urayen dagiti investors tapno agibautda iti negosioda iti ecozone”.

Kinuna ti dati a gobernador nga iti panagbalin ti China a superpower, aglippias dagiti pagimbagan iti probinsia gapu iti kaasidegna iti nasao a pagilian.

Impila manen ni Cong. Singson daytoy a gakat nga immuna nga impila ni dati a Dip. Salacnib Baterina agsipud ta saan a naaktuaran iti bicameral conference committee gapu ta nasakaw iti eleksion idi Mayo 14, 2007.#