Footer

Gakat a mangideklara iti Bessang Pass a tawid ti pagilian, naipasa iti Kamara

CANDON CITY – Inaprobaran itay nabiit ti House of Representatives iti maikatlo ken pinal a pannakaibasana ti maysa a gakat a mangideklara iti Bessang Pass idiay Cervantes, Ilocos Sur a maysa a tawid a nasional ken protektado a lugar.


Kinuna ni House Deputy Speaker Eric Singson, autor iti nasao a gakat, a dakkel ti panagtalekna a mapirmaan daytoy a linteg sakbay ti panagtapos daytoy a tawen.

Maipalagip a napasamak iti Bessang Pass ti maysa kadagiti kadaraan a ranget idi maikadua a gubat ti sangalubongan iti nagbaetan dagiti Filipino a gerilia ken dagiti Singkit iti babaen ni Gen. Tomoyuki Yamashita.

Ti Bessang Pass ti napili ni Yamashita a maudi a sarikedkedna iti pannakirupakna kadagiti umab-abante a puersa dagiti Amerikano ken Filipino.

Sumurok-kumurang a 3,400 dagiti gerilia a Filipino ti napasag ken nadundunor iti daytoy a ranget a naggibus idi Hunio 14, 1945.

Kas pananglagip iti kinatured nga impamatmat dagiti Filipino a gerilia, naipatakder ti maysa a monumento iti lugar a nakapasamakan ti ranget, iti tapaw ti bantay a nakabeltakan ti kalsada a kumamang iti Cervantes, Ilocos Sur.

Kinuna ni Singson a ti pannakaipasdek ti national a monumento iti Barangay Malaya, Cervantes, Ilocos Sur a kas protektado a lugar, masalakniban ken makonserba dagiti napintas a buya ken kultural ken historikal a pakabuklan ti nasao a lugar.#