Sinursuran: Gapu iti asaynment… | Tawid News Magazine - Weekly Ilocos News 📰
sinursuran-banner-sqSinursuranNi Jobert M. Pacnis

Gapu iti asaynment…

MALAGIPKO idi addaak iti elementaria. No agawidak nga aggapu iti pagadalan iti malem, pagdiretsuan a damagen ni nanang no adda asaynmentko kabayatan ti panangtulongko kenkuana nga agluto iti pangrabiimi. Wen, addaak la a pasalsali no panagluluto ta insurodak a tumulong uray agimuri laeng kadagiti nateng wenno mangisagana kadagiti rekado.

Apaman a maibagak nga adda asaynmentko, dagdagusennak ni nanang a mangasikaso iti daytoy apaman a malpaskami a mangrabii. Ket iti lamisaan iti suli ti kalapawmi a de-gaas laeng ti silaw, ipamaysak a leppasen ti asaynmentko. No adda diak ammo, iti dayta laeng nga agdamagak kada nanang ken tatang.

Kabayatan ti panangaramidko iti asaynmentko, dardarasen nga ileppas ni nanang ti panangidalimanekna iti lunglonganmi. Kalpasanna, umaynakon kadkaduaen. Nakadungdungngo a mangiwanwanwan kadagiti makitana a nagbiddutak.

Apaman a makariingak iti agsapa, gapu iti panagpatpatang da nanang ken tatang iti kosina, alaek dayta a gundaway a mangrepaso kadagiti leksionko. No saan, ituloyko dagiti diak nalpas idi rabii.

Nagbalin dayta a routine-ko iti inaldaw a kaadda ti klase.

Ket idi timmapogakon iti hayskul, bukodakon ti agaramid kadagiti asaynmentko. Saan a gapu ta didak kayat a tulongan da nanang ken tatang. Ad-adda kano a siak ti makaammo iti amin ta siak ngarud ti sumsumrek iti klase. Saanen a kabaelan ti isipda ta saanda met a nakangato iti naragpat nga adal.

Gapu iti rigat ti nariinganda a panagbiag!

Isu a kasta laengen ti panangiduronda kadakami nga agkabsat a makalpas iti adal tapno saanminto kano a pasaren ti rigat a paspasarenda.

Nagtultuloy ti panagsolsolok nga agar-aramid kadagiti asaynment idi addaakon iti kolehio. Ket makunak a dakkel ti naitulong ti pannakasanayko idi addaak iti elementaria. Nagbalin pay a nadekket ti langenlangenmi kadagiti dadakkelko.

Wen, nabayagen a paset ti panagadal ti kaadda ti asaynment a masapul a leppasen. Dakkel ti papelna daytoy iti maysa nga agad-adal. Maysa daytoy a paset iti pannakagupgop ti grado ti maysa nga ubing tapno makita no maipasana wenno saan ti suhetona.

Ken iti nabayag, nagbalin ti asaynment a paset ti lesson plan (daily lesson log itan) ti maysa a mannursuro. Kurang no awan daytoy a pasetna.

NGEM itan, mabalin a maikkatton dayta a paset ti isagana a leksion ti maysa a mannursuro. Maysa ngamin a gakat ita ti magmagna a maminpinsanen a mangipawil iti panangited ni mannursuro iti asaynment kadagiti adalanna. Ta malagip, idi panawen ni Sekretario Armin Luistro ti Departamento ti Edukasion, naipawilen ti panagited iti asaynment no kasta a malem ti Biernes. Kangrunaan a rason no apay a kasta, tapno kano maipamaysa ti agad-adal ti tumulong iti pakaseknan ti pamiliada. Saanen nga asaynment ti obraenna no bakasion.

Ita, panggepdan a maminpinsan nga ikkaten ti asaynment iti biag dagiti agad-adal!

No agkabsiw ni mannursuro ket nailaw-anna ti nagpaasaynment, dakesen! Mabalin a mamulta iti limapulo ribu pisos ken mabalud iti aginggana iti dua a tawen!

Gapu itoy, nadumaduma a reaksion ti pinaltuadna iti publiko.

Ngem mismo a ni Sekretario Leonor M. Briones ti Departamento ti Edukasion, impeksana ti panangpaborna iti nasao a gakat. Kunana a maipaay kano ti naan-anay a panawen kadagiti ubbing a makilangen kadagiti nagannak kadakuada. Ken mapalpaliiw a saan kano met a dagiti ubbing wenno adalan ti agar-aramid iti maited kadakuada nga asaynment no di ket dagiti dadakkelda. Wenno ti katulongda.

Saan ngarud a dagiti ubbing ti matulongan wenno maasa no kasta a maikkanda iti asaynment. Ta kapanunotan wenno abilidad met dagiti nagannak wenno katulong ti nagwerret!

A dagus a kinontra manen dagiti nadumaduma nga indibidual.

No pudno a panggep ti gakat nga ikkan ti naan-anay a panawen dagiti ubbing iti panawen a makatulongda kadagiti nagannak kadakuada ken mapapigsa ti kinnayammetda, saan a solusion ti panangikkat iti asaynment iti biagda a kas agad-adal. Ta no kitaen ti agdama a taray ti biag, manmanon a makapagpapatang dagiti annak ken nagannak. Makumikom ti tunggal maysa.

Nasapa pay laeng, rummuaren dagiti nagannak tapno sumrekda kadagiti panggedanda. Kaaduanna a nakaturog pay laeng dagiti annakda. Iti met malem a panagawidda, no di nakaturog dagiti annakda, telebision ti agpapada a sanguenda. Ti nakas-ang ditoy, saan man la a mapagpapatangan ti napasamak iti pagadalan.

No saan, selpon a dagus ti sanguen dagiti annak apaman a nagturongda kadagiti kuartoda. Saan metten a bibiangan dagiti nagannak ta yiladda metten ti bannogda a nagtrabaho.

Kasano ngarud nga adda bonding iti nagbaetan dagiti kameng ti pamilia no kasta ti naynay a mapaspasamak?

Malaksid kadagiti agad-adal, adda met nagannak a pabor ti pannakaikkat ti asaynment iti biag dagiti annakda. Ta adda kano mannursuro a sobra no agited iti asaynment. Sangabuntuon no labsen ti manarita. Sa arig amin a subject teacher dagiti annakda ket adda itedda nga asaynment. Di kad tengnganton ti rabii, di pay naiturog dagiti annakda!

Itoy nga isyu, kitaen koma ngarud met dagiti mannursuro no kasano nga agitedda iti asaynment. Saan a daytay kasla pannusa, pangparigat kadagiti ubbing. Ekstension koma daytoy iti panangisuro kadakuada.

Segun met kadagiti eksperto, no maikkat ti asaynment iti biag dagiti agad-adal, kurang ti proseso ti panagadal. Isu nga adda asaynment tapno matulongan dagiti ubbing iti panagbasada. Mamuli iti isipda ti anag ti responsibilidad. Maasa ti abilidadda. Ken saanda nga agbalin a sadut.

Nagpaiduma pay a ragsak ti ipaay ti panagaramid iti asaynment aglalo no inaramid a bukbukod. Mangbangon daytoy iti talek/panagtalek iti kabaelan.

Oras ngarud nga ikkaten a naminpinsan daytoy, kasla metten napilay ti proseso ti panagadal. Kurang. Ken no kasta met laeng, di baliwan ngarud met ti proseso a makompiut ti grado dagiti ubbing. Ken adu dagiti rumbeng a mabalbaliwan.

Apay nga ita laeng daytoy a mapanunot dagiti otoridad? Idi panawenda, saan kadi a dakkel ti naitulong kadakuada dagiti asaynment nga inted dagiti titserda? Adda kadi rimsua a problema?

Ti dakkel pay a saludsod, awan kadin ti mapanunot dagiti lidertayo a napimpintas a linteg a makatulong iti sangkailian?

No dayta koma problema dagiti mannalon ti kitaenda?

Ti nakakatkatawa pay ita, no mapatuloy a linteg daytoy a gakat, kalebelton dagiti mannursuro dagiti kriminal. Ta maysanton a krimen ti panagited iti asaynment. Pumudnonton daytoy agwarwaras iti social media:

Iti pagbaludan…

Balud 1: Ania ti nagbasolanyo?

Balud 2: Nangramesak ken nakapatayak…

Balud 3: Nagtakawak iti riniwriw…

Balud 4: Natiliwanak iti kinilo a maiparit nga agas…

Balud 5: Nagpaasaynmentak iti klasek…

Mabalin a maysa laeng a pagkakatawaan daytoy ita. Ngem di bumurong a mapasamakto, di kadi?

Wenno pudno ti nasao daydi Sen. Mirriam Defensor Santiago? Kunana man: “I have realized why corrupt politicians do nothing to improve the quality of public school education. They are terrified of educated voters.”