Gapu iti kaawan ti medida: problemanto latta panagduma iti interpretasion iti grado ti tabako: DV

VIGAN CITY – Ti pannakagrado ti produktoda a tabako ti pakagundawayan dagiti agmulmula iti tabako, daytoy ti naipeksa ni Vice Governor Deogracias Victor Savellano iti maysa nga interbiona iti radio itay nabiit.

Kinuna ni Savellano aĀ  maysa a pakaatiwan dagiti tobacco farmers ti pannakagrado ti bulong ti tabakoda ta kapaliiwan nga agduma ti interpretasion iti panaggraduan iti daytoy a produkto.

Inlawlawag ti bise gobernador a gapu iti kaawan iti medida wenno sampleĀ  a pagbatayan no ania ti grado dagiti bulong ti tabako, agduduma ti interpretasion iti klaseda ket ti kuna dagiti mannalon a nangato ti klasena a produktoda, mabalin nga agtungpal a nababbaba agsipud ta sabali met ti pannakagradoda iti trading center.

Malaksid iti nababa a presio, maysa a lagidawen dagiti mannalon iti tabako ti saan a nasayaat a pannakagrado ti produktoda a tabako.

Ngem kinuna ni Savellano a mabalin a ti double A a grado ni mannalon iti produktona a tabako ket agtinnag laeng a Class A wenno B iti pananggrado ti trading center a pangilakuanna iti tabako agsipud iti kaawan iti napagpapatangan a pagibatayan iti klase dagiti bulong ti tabako a pakaatiwan ni mannalon ket agtungpal a basbassit nga amang ti paglakuanna iti produktona a tabako.

Kinuna ti bise gobernador nga idagdagadagna pay la idi ti pannakaiwayat ti seminar tapno adalen ken agsisinnurot dagiti mannalon, traders ken manufacturers iti pagbatayan ti pannakagrado dagiti bulong ti tabako tapno saan nga agduduma ti interpretasion.

Kinunana a rummuarto latta a problema ti pannakagrado dagiti bulong ti tabako agingga nga awan ti medida wenno sample a suroten iti pannakagradoda.

Kabayatanna, dismayado dagiti mannalon gapu iti nababa a presio ti produktoda a tabako.

Linagidaw ni Mayor Ferdinand Banua ti nababa a presio ti tabako idinto nga idi napan dagiti traders iti lugarda, imbaga dagitoy a napintas ti kalidad ti bulong ti mulada a tabako.

Ngem iti pannakiuman ti media ken ni National Tobacco Administrator Edgardo Zaragoza, imbatadna nga agdepende ti presio ti tabako iti kalidad ti bulong daytoy kangrunaan a produkto iti Ilocos Sur.

Innayon ni Zaragoza a gapu iti tikag, naapektaran ti kalidad ti tabako.

Kabayatanna, indagadag ni Savellano a malaksid iti tripartite conference, maangay koma ti seminar dagiti mannalon, traders ken manufacturers no sadino nga agsusurotda iti interpretasion ti panagklasean iti bulong ti tabako tapno di maatiwan ti maysa a partido iti panagraduan iti tabako.

Kinuna ni Savellano a ti met laeng presio ti tabako ti mapagpapatangan iti tripartite conference ngem saan a madakdakamat ti sistema ti pannakagrado daytoy kangrunaan a produkto ni mannalon.

Inton Septiembre daytoy a tawen a maangay ti tripartite conferenceĀ  a dar-ayan dagiti mannalon, traders ken manufacturers tapno mapagpapatangan ti floor price ti tabako. Maang-angay ti tripartite conference tunggal dua a tawen.

Ti Ilocos Sur ti kadakkelan ti bingay iti excise tax ti tabako agsipud ta 70% iti produksion ti tabako ti aggapgapu ditoy a probinsia.#