Footer

Gapu iti panagpangato ti krimen iti siudad hepe ti polis, naimbitaran iti konseho

VIGAN CITY – Naimbitaran ti hepe ti polis  iti sumaruno a session ti sangguniang panlungsod ditoy gapu iti kapaliiwan ti maysa a konsehal a panagpangato ti krimen iti siudad, partikular ti panagraira dagiti Akyat-Bahay Gang.

Indagadag ni Konsehal Everin Molina a mapaayaban ni Police Chief Inspector Maximo Taclas, hepe ti polis, ta rumbeng laeng a maaksionan dagitoy a mapaspasamak iti siudad ken kasapulan ti naing-inget a panagmonitor dagiti polis babaen ti tele-eye a naipasdek iti nadumaduma a paset iti siudad.

Ngem insingasing ni Konsehal Loreto Quibilan a saan nga iti legislative session ti dumatagan ni Taclas no di iti maysa nga executive session agsipud ta adda dagiti confidential nga impormasion a saan a rumbeng a maipakaammo iti publiko, kangrunaan no panggep iti krimen.

Kinuna ni Vice Mayor Francisco Ranches, Jr., a sakbay a mapan agpalawag ni Taclas iti konseho, maiballakad kenkuana a ti laeng report maipanggep iti urnos, talna ken kappia ti dakamaten ken idatagna ken no ania ti ar-aramiden ti kapolisan tapno masolusionanda.

Kabayatanna, naikiddaw ti pannakaipasdek dagiti stop-lights  ditoy siudad tapno ad-adda pay a mapapintas ti panna-kamanehar ti trapiko ken matulongan dagiti traffic enforcers ditoy.

Kiniddaw ni Molina, chair ti committee on transportation, ti pannakaadaptar ti singasingna a resolusion a panangted iti autorisasion ken ni Mayor Eva Marie Medina a mang-install kadagiti stoplights iti nadumaduma nga intersection iti siudad.

Nairekomenda a a maipasdek dagiti stoplights kadagiti matrapik a nagkurusan kas iti Florentino St. ken Quezon Ave., Bonifacio St ken Quezon Ave., Liberation Blvd ken Quezon Ave., Rizal St.ken Burgoz St., Liberation Blvd ken Rizal St.

Ngem segun ken ni Konsehal Lulu Baquiran, adda ideana  a nangina ti presio dagiti stop-lights.

Gapu itoy, kiniddaw ti Quibilan, chairman iti committee on finance ti panakaitantan a maadaptar daytoy a proposed resolution ta maikonsulta pay iti mayor, banag a kinanunongan dagiti konsehal. (Nemia Icari)