Garakgak ken garikgik ti imbati daydi National Artist for Literature Alejandro R. Roces (Maudi a paset)

Makapaisem met a sarita! Dakkel ti kaipapananna iti sosial a panagbiag. Naimpluensiaanen ni Filipino   iti panagbiag dagiti ganggannaet idinto ta addaan met iti kabukbukodan a gimong a nasken nga itandudona. Ti mensahe ket nalawag a panagdupar ti impluensia ti baniaga ken ti kabukbukodan. Ipaganetgetna ti panagayat iti kabukbukodan wenno kinaadda ti kabukbukodan a nasken nga itandudo.

Talaga a nalaing a piktionista ni Alejandro R. Roces nga isu pay kadagiti paboritok a kolumnista. Kolumna ti ‚ÄėRoses and Thorns‚Äô iti Philippine Star. Napintas dagiti topiko nga inna sursuraten ta nailaga kadagita ti maipapan iti panagbiag ken kultura ti puli nga isu met ti pagaayattayo a basbasaen. Nakaawaten iti sumagmamano a pammadayaw gapu kadagiti sinursuratna kadagiti nadumaduma a nasional ken internasional a babasaen.

Gapu ta mabigbigbig iti panagsuratan, innala daydi Presidente Diosdado Macapagal a kas kameng ti gabinetena kas sekretario iti Department of Education manipud idi 1961 agingga iti 1965. Kas kameng ti gabinete ni Presidente Diosdado Macapagal, isu ti prinsipal a makinnakem iti pannakabalbaliw ti Independence Day manipud iti July 4 iti June 12. Idi napukaw dagiti sinurat ni Dr. Jose Rizal iti National Archives, isu ti nagurgoran a nagsapsapul ket naisubli daytoy a nailian a kinabaknang. Isu ti nangpalatak kadagiti piesta a nagbalin a festival,  kas iti Moriones ken Ati-atihan.

Idi 2001, pinusgan ni Presidente Gloria Macapagal-Arroyo a kas chairman iti Movie and Television Review and Classification Board (MTRCB). Nagbalin pay a  kameng ti Board of Trustees ti Government Service Insurance System (GSIS).

Naiyanak ni Alejandro Reyes Roces idi July 13, 1924 sadiay Manila. Nagadal iti elementaria ken sekundaria sadiay Ateneo de Manila University. Sadiay met Arizona State University a nagraduar iti Bachelor of Fine Arts. Sadiay Far Eastern University a naiturposna ti Master of Arts.

Iti bukodko a kapanunotan, awan pay laeng ti immallawat iti tronoda (ni Carlos Sampayan Bulusan, iti Binalonan, Pangasinan ti maysa pay) iti panagsuratan ti makapakatawa a sarita.  Duada laeng a Filipino, ti establisado ti naganda itoy a benneg.

Kas iti sarita ni National Artist for Literature 2003 Alejanrdro R. Roces, dinto met mapunas iti lagip ti makapakatawa a sarita ni Bulusan. Maipapan ti panangidarum ti maysa a nabaknang a pamilia iti maysa a napanglaw nga ama. Ti argumento ti naidatag a kaso, taktakawen kano ni napanglaw ti espiritu ti kinaimas ti taraon nga ilutluto dagitoy a nabaknang, isu a nalukmeg ken nasalun-at dagiti annak itoy napanglaw nga ama idinto a masaksakit, napusiaw ken nakuttong dagiti annak ni baknang.

Situtured ngarud ti napanglaw nga ama a dimmatag iti korte. Imbilin pay ti hues a mabalinna latta ti mangala iti abogado a mangdepensa kenkuana ngem kinuna ti napanglaw nga ama a saanen a nasken ta kabaelanna a depensaan ti bagina.

Dinamag ti napanglaw nga ama no ania ti pammabasol a nakaidarumanna. Inrason met ti nabaknang nga ama a no aglutoda ket maangotda ti imas ti lutlutuenda, kayarigan daytan ti panagtakaw ta saanda met a pinalubosan nga alaen dagiti napanglaw ti espiritu ti kinaimas dagiti taraon dagiti baknang.

Kiniddaw ti naidarum ken ni apo hues a mapalubosan koma a mangiwayat iti aramidenna. Nangiruar kadagiti sensilio sana intinnag ken dinamag iti nabaknang no nangngeg daytoy ti kalangiking ti sensilio. Inulit-ulit ti naidarum ti inaramidna ken inulit-ulitna ti nagdamag no nangngeg ti nagdarum ti kalangiking ti sensilio. Wen, kinuna latta met ti nagdarum. Impinal ti naidarum a ti kalangiking dagiti sensilio ti bayad ti naangotda a naimas a taraon dagiti baknang! Agkatkatawa pay ti hues a nangitik-ol ti malietena ken nangibilin a mawaswas ti pammabasol iti naidarum.

Kaniak a biang, awan pay laeng ti immallawat iti trono da Bulusan ken Roces no panagputaran iti makapakatawa a sarita.#