Gasat iti Lukong ti Dakulap (Maikadua a paset)

SARITA NI MARITES RUIZAN

NALAING koma met in Insan Angie no igaedna ti agbasa. Ngem ad-adda a ti aguldag ti atupagenna no sumangpet iti pagadalan.  Uray Sabado wenno Domingo, saan nga agtalna iti balayda ta masansan nga awisen dagiti barkadana a mapan agpasiar iti Vigan City wenno iti Laoag City.

Nalimed nga ap-apalak ni Insan Ansing. Maited amin a kayatna. Iti pribada a pagadalan iti poblasion ti pagbasbasaanna. Sa la aggawid iti Sabado.

Kastaak koma met, nakunkunak iti nakemko.

Maysa a rabii ti Sabado, kalpasan ti panangidalimanekko iti nangananmi, immulogak. Nagtugawak iti sementado a tugaw iti sirok ti narukbos a mangga. Tinangadko ti langit. Kasla diamante nga agkilapkilap iti tangatang dagiti bituen. Nalagipko manen ti impadto ti mammalad. Nagsennaayak. Kastoy la kadin ti panagbiagko?

Adda nagkarasakas iti likudak. Naapput dagiti matak. Ni Insan Angie.

“Oy, agar-arapaapkan sa,” insutilna. “Ni Prince Charmingmo siguro, ania?”

“Buybuyaek dagiti bituen, Insan. Kasdiayda koma met karimat ti bukodko a bituen. Ngem kas kasipnget ti bituenko ti rabii.”

“Malaglagipmo ti padto kenka ti baket, ania?”

Nagtung-edak. “Awan sa latta ti turongek iti biag, Insan,” kinunak.

“Huh! Patpatiemto met. No naikari a gasatmo, uray ania ti aramidem, gasatmo latta. Dimo unay pampanunoten dayta. Ti importante, makaturposka iti sekundaria. Ni Daddy, imbagana nga agadalak iti medisina. Ngem diak kaya, sika. Napia pay kenka ta masiribka.”

“Taltalekmo pay ta dimo problema ti pagbasam. Siak, parikutko ti pagbayadko ti tuisionko. Diak la ketdi makaeksamen no diak makairemedio.”

“Ne, ti ammok ket nabayadam aminen,” kinuna ni Insan Ansing. “Apay a dimo imbaga kaniak? Ba’am ta kasaritak ni Daddy.”

“Agyamanak. Naimbagka unay,” makasangitak pay iti ragsakko.

“Huston dayta drama!” tinapikna ti abagak.

Insursurotko ti panagkitak iti likudanna. Napusot ti nauneg a sennaayko. Nagyamanak ta mannakaawat ni Insan Angie.

Ngem diak latta nagawidan ti yaapalko kenkuana. Apay a kastoy ti biag, adda dagiti naparaburan unay, idinto nga adda dagiti kas kaniak a makurkurangan?

Inyangadko ti rupak, ket tinaliawko dagiti namirit a bitbituen iti tangatang. Ngem saankon ida a nakita ta liningdan idan ti nangisit nga ulep.

Nalagipko manen ti padto ti baket kaniak. Immangesak iti nauneg. Pumayso ngata?

SIAK ti balediktorian iti klasemi. Kinablaawandak dagiti kaklaseak. Sinutildak pay nga ag-blow-outak. Ngem naglaok a ragsak ken liday ti nariknak. Naragsakak ta makaturposakon iti high school. Ngem malidayannak ta awan ti aruatek nga agturpos.

Natinongko a diak agparang iti graduation program. Ammo met dagiti paggianak a lawas laengen ti palabsen ket agturposkamin ngem dida met agkutkuti a gumatang iti badok.

Nupay napalalo nga ayatko, mabainak a mangibaga a pautangandak da Angkel Isio. Ammok nga agpunsionda iti panagturpos ni Insan Angie. Kakaisuna nga anakda ngamin. Sa adu dagiti gagayyem ni Angkel Isio.

Nakaluaak a nangay-ay iti kasasaadko.

Maysa a malem, nagkuyog da Angkel Isio ken ni Insan Angie a naggawid. Adu ti bungon nga insangpetda. Ammok lattan nga aruaten ni Insan Ansing ken regalo ni papangna dagiti bungon. Nakariknaak iti apal ngem diak impadpadlaw.

Inayabannak ni insan Angie iti kuartona. Madama nga isuksukatna ti badona nga agraduar.

“Bagay met la kaniak?” inamadna.

“Ayna, nagpintaskan, Insan!” nayesngawko.

“Dinak man bolaen,” immisem ni Insan Angie. “Adda sagutko kenka,” kinunana sana insungo ti nalabaga a bungon a naiparabaw iti lamisaan.

“Para kaniak?” dandani diak mamati iti nangngegko.

“Oy, agawaam a luktan ta dinto ketdi agbaliw ti panunotko,” inwitwitna.

Makarkarattotak a nangwarwar iti bungon. Napamulagatak. Puraw a bado a pagturpos!

Nakaluaak. Daytoyen ti karagsakan a paset ti biagko!

(Adda tuloyna)