Gasat iti Lukong ti Dakulap (Maudi a paset)

Sarita ni Marites Ruizan

Maysa nga aldaw, nagpukaw ni Insan Angie. Madlaw idin ti sikogna. Maysa a surat ti imbatina kaniak. Umadayo kano tapno ipasngayna ti anakna iti lugar nga awan ti makaam-ammo kenkuana. Pinagkarinak a diak ibagbaga ken ni Angkel Isio ti napasamak.

Ngem kastay kunadan, awan ti palimed a di maibutaktak. Naammuan ni Angkel Isio ket sinumarianak. Kapilitan nga impudnok ti amin. Binabalawnak ni Angkel Isio ta diak man la binallakadan ni Insan Angie ken impakaammo kenkuana ti napasamak.

“Alikumkomem dagiti aruatem ta agkuyogtan nga aggawid,” kinunana. “Saankan nga agtuloy nga agbasa ta awan metten ni Angie.”

“Agbatiak, Angkel,” nakunak. “Tallo laengen a bulan ket agturposakon. Sayang ti makatawenko.”

“Awanen ti namnamaem a kuarta nga aggapu kaniak,” kinunana.

“Makaammodtan, Angkel,” nakunak. “Ikarigatak a leppasen ti nairugik uray agbisinak.”

“Sika ti makaammo,” kinunana. “Inton umay a bulan, agbirokkan iti umakaram ta saankon a bayadan ti upa.”

Kinuentak ti adda nga urnongko manipud iti alawans ken it-ited ni Insan Ansing idi dina pay nasumok ti bisio. No aginutak, maiyan-anayko iti dua a bulan.

Kimmitaak iti nalaka nga abangan. Nakakitaak iti bed space. Pangadaywen iti pagbasaak ngem inan-anusak ti magna iti bigat ken malem. Iti aldaw, manganak iti turo-turo, iti panganan nga adda diskuento dagiti estudiante.

Ngem uray kasano a panaginutko, awan pay dua a bulan, maibbusen ti kuarta. Nagdanagak. Kasano itan? nakunak.

Nagbirokak iti pagtabahuak iti Sabado ken Domingo. Ngem pasig nga awan bakante.

Pannakairanranana, makasapul ni Mrs. Lamaria, ti librarian ti pagadalan, iti katulonganda nga agurnos ken agnumero kadagiti libro iti biblioteka. Part-time ti kasapulanda. Nagaplayak uray ammok a bassit ti sueldo. Napia la a pangnaynayon iti nabatbati pay a kuartak. Naawatak met, kaasi ti Dios.

Idi naammuan ni Mrs. Lamaria a graduating studentak, pinalubosannak nga agbasa iti leksionko iti library no kasdiay nga awan unay dagiti tamingenmi. No dadduma, iyarikapannak iti para meriendak. No kasdiay nga agkitakitak, mulagatannak sa agkatkatawa a mangipabulsa kaniak.

“Agsubsubalitakto, Manang,” nakunak laengen.

“Ay, kasano a makasubalitka ket saan metten nga uso ti surat no di pasig tattan a text iti selpon,” inyangawna kaniak.

Siak ngatan ti karagsakan a parsua idi agraduarak. Siak ti kangatuan iti promedio. Naammuan ti dean a working studentak. Innalanak nga agtrabaho iti opisinana. Pinalubosannak pay a mangituloy ti panagbasak bayat ti panagtrabahok. Nagyamanak unay kenkuana ta naawatanna ti kasasaadko.

Intuloyko ti abogasia. Nupay magabsuonanak iti trabaho iti opisina ti dean, inkarkaritagatak nga impaayan iti panawen ti panagadalko. Kimmappengak iti debating team ti pagadalanmi. Iti maysa a salip ti debate dagiti kolehio ken unibersidad, dakami ti nagkampeon.

Idi addaak iti maikatlo a tawenko iti abogasia, naam-ammok ni Leonard. Iti damo pay a panagkitami, nagpitik ti pusok. Nagdaton kaniak. Imbagak kenkuana a no makauray, kukuana ti pusok kalpasan ti panangun-odko iti arapaapko.

Idi agangay, bimmattaway ti isasarungkar ni Leonard. Di mabayag, nadamagko a nagkasaren.

Sinangitak iti nalimed ti yaadayo ni Leonard. Ngem ti sugat ti puso, aglunit. Nakunak iti nakemko: saanko nga itulok a ni ayat ti makagapu iti diak pannakatun-oy iti arapaapko.

Simmaruno ni Noel. Sa ni Adrian. Dida nakauray. Imbilangko laengen ida a paset ti kalbario a baklayek sakbay a makatapawak iti balligi.

Nagturposak iti abogasia nga addaan pammadayaw. Iti dayta met la a tawen, nageksamenak iti bar. Siak ti maikapat.

Inrekomendanak ti deanmi iti maysa a nalatak a bupete. In-inut a ditoy ti dimmakkelan ti naganko.

Maysa nga aldaw, naklaatak idi masangailik ni Insan Ansing. Naginnarakupkami.

Naammuak nga addan asawana. Pinakawan met laengen ni Angkel Isio. Agnaeddan iti barangaymi. Nagbasa gayam iti kinamaestra iti ilimi. Ita, mangisursuron iti barangaymi.

“Ita man pay a naidaw-aska?” nakunak.

“Umaydaka awisen a naisangayan a sangaili iti graduation exercises ti pagadalantayo,” insungbatna. “Sika ti makitak a kapintasan nga ehemplo ti nagballigi a kapurokanmi babaen ti determinasion ken saririt.”

“Maestraka la nga agpayson,” inyangawko. Pinaayabak ti sekretariak. Dinamagko no adda appointmentko iti petsa nga imbaga ni Insan Ansing. Adda bistami. Dakkel a kaso.

“Paikalendariom iti sabali a petsa,” kinunak. “Diak mabalin a makapagsaan iti kabagiak. Ken mailiwak metten nga aggawid. Nasuroken a sangapulo ket lima a tawen!”

“I’m happy for you,” kinuna ni Insan Ansing. “Malagipmo di maysa a rabii a panangtangtangadmo kadagiti bituen? Nakunam a kas kalidem ti rabii ti masakbayam. Well, saan a pimmudno ti padto daydi baket. Nagballigika!”

Awanen ni Insan Ansing ngem nabayag a namulenglengak ti bobeda.

Ammok itan a ti met laeng tao ti mangikur-it iti gasatna iti lukong ti dakulapna – babaen ti panagagawana ken kaadda iti napigsa a determinasionna nga agballigi.#