Gasolinaan, tinakawan ti dua a lalaki a nakamotor

BANTAY, Ilocos Sur –  Sumagmamano nga aldaw ti pannakapasamakna, di pay nabigbig dagiti dua lalaki a nagpammarang a kustomer  a nangkasakas iti koleksion a kuarta ti maysa a gasolinaan ditoy itay nabiit.

Nagpulong iti polis ni Florante Rosario, 29, baro, gasoline boy, a dua a lalaki a nakamotor ti nangitaray iti naglakuanda iti gasolina iti agarup alas 3:30 ti parbangon ti Nobiembre 25.

Segun iti panagimbestiga ti polis ditoy, dua a lalaki a naglugan iti Dio a chopchop a motorsiko ti napan gimmatang iti 2-T oil iti Petron Gasoline Station a masarakan iti igid ti national highway a sakup ti Zone 5 ditoy.

Nagturong ti gasoline boy iti kaabay ti paggasolinaan tapno mangala iti 2-T oil ket ginundawayan dagiti suspetsa ti nangkasakas iti kuarta nga adda iti drawer ti lamisaan sada pinakaskas ti luganda a nagpalaud.

Mapattapatta a sumurok-kumurang a P4,000 ti dagup ti naglakuan ti gasolinaan iti dayta a parbangon.

Segun ken ni Rosario, nagasat ta naidulindan ti dakdakkel a kadagupan ti naglakuanda sakbay ti panagtakaw.

Kinuna ti gasoline boy a makalakoda iti gasolina iti manipud iti P50,000 agingga iti P70,000 iti agpatnag.

Iti pannakaisurat daytoy, saan pay a nabigbig dagiti nagisayangkat iti nasao a panagtakaw.

Kabayatanna, natay kalpasan ti pannakapaltogna ti maysa a nakamotorsiklo a lalaki kabayatan nga agdaldaliasat iti national highway a sakup ti Barangay Puspus ditoy.

Saanen a naidanon ti biag ni Dominador Domenden, 46, naasawaan ken residente ti Barangay Ora West, Bantay, iti ospital gapu kadagiti sinagrapna a sugat.

Maibasar iti inbestigasion  ti polis ditoy, agturong iti daya a direksion ti biktima a nakalugan iti motorsiklona a Yamaha nga awanan plate number idi linabsan ti saan a nabigbig a suspetsa sana pinaltopaltogan.

Nagsagaba ti biktima iti dua sugat iti bagina.

Saan pay laeng nga ammo ti motibo ti pasamak.#