Gasoline boy, nakipaskua iti pagbaludan

CANDON CITY – Nakipaskua iti pagbaludan ti maysa a gasoline boy kalpasan a naipalab-og iti buy bust operation iti sanguanan ti Flying-V Gasoline Station sadiay Barangay Paras ditoy siudad idi sumipnget ti Disiembre 25.

Inaresto dagiti polis-Candon ni Sonny Andres y Gacusan, 22, ken residente iti Barangay Balingaoan, ditoy siudad kalpasan a nakakumpiskada iti ikutna iti maysa a plastic bag a naglaon iti mapapati a napagango a bulong ti marihuana nga addaan iti fruit toppings, maysa a selpon a mapapati nga inaramatna iti transaksion, dua a sag-P50.00 a naaramat a buy bust money.

Naipan ti suspek iti police station tapno makipaskua iti pagbaludan.

Iti sabali a damag, dua a tattao ti napilaan iti kaso a panaglabsing iti RA 9165 ken RA 10591 iti provincial prosecutor’s office, Candon City itay nabiit.

Nabigbig dagiti suspek a da Medel Guirnalda y Feraldo, 31, naasawaan, ken residente iti Barangay San Jose, Candon City ken Alma Escolar y Morales, 30, awanan asawa, natibo iti Dinalupian, Bataan ngem agdama nga aggigian iti Barangay San Nicolas, Candon City.

Naaresto da Guirnalda ken ni Escolar babaen ti buy bust operation nga insayangkat dagiti police elements ti Sta. Cruz police station ken PDEA-INIS nga indauluan ni Police Inspector Diony Victorio Regacho Balancio ken iti koordinasion ti PAIDSOTG sadiay Barangay Sidaoen, Sta. Cruz, Ilocos Sur partikular iti Centrum Gasoline Station idi agarup 4:00 p.m. ti Disiembre 18.

Nakakumpiska dagiti polis iti ikut ni Guirnalda iti maysa a heat sealed plastic sachet a naglaon iti mapapati a shabu, maysa a plastic straw, maysa a lighter, dua a pakete ti Marlboro cigarette, dua a sim card, maysa a bala ti cal. 22, maysa a bala ti cal. 38, dua a sag-P50.00, maysa a P100.00, maysa a P5.00, 3 a sag-P1,000.00 a naaramat a buy bust money, 2 coin purse, 2 set ti tulbek, ken maysa a Honda Wave 125 motorcycle.

Naikustodia dagiti dua iti police station ti Sta. Cruz idinto a naipatulod dagiti nakumpiska a plastic sachet a naglaon iti mapapati a shabu iti Regional Crime Laboratory Office a nakakumpirmaran a positibo a droga dagitoy.#