Latest News: Mandar ni Gen. Albayalde kadagiti polis iti Ilocos Sur: Be fair and stay neutral | Tawid News Magazine - Weekly Ilocos News 📰

Mandar ni Gen. Albayalde kadagiti polis iti Ilocos Sur: Be fair and stay neutral

BANTAY, Ilocos Sur — “Be fair and stay neutral during the campaign and election or you will be penalized.”

Dayta ti nainget a mandar ni General Oscar Albayalde, Chief of Philippine National Police kadagiti amin a polis kabayatan ti ibibisitana iti Ilocos Sur Police Provincial Office, Camp President Elpidio Quirino, iti daytoy nga ili idi malem ti Marso 27, 2019.

Impaganetget ni Gen. Albayalde a kas kameng ti PNP ket rumbeng nga agbalinda a patas ken agtengtengngada laeng kabayatan ti kampania ken eleksion tapno agbalin a nakappia ken natalna daytoy a panagpipili, Nagballaag ti PNP Chief nga agsagrap ti tumutop a dusa dagiti matakuatan nga aglabsing iti direktiba. Impakaammona nga addan dagiti polis iti Ilocos Sur a naidestino iti sabali a probinsia tapno mapasingkedan a patas ti PNP ti panangakemda kadagiti annongenda.

Inlawlawagna nga awan ti ili iti Ilocos Sur a nairaman iti Code Red nga indeklarar ti Commission on Elections ken PNP a nainget a mabantayan gapu iti kaadda ti pakasaritaan iti political violence iti naglabas nga eleksion, ngem adda dagiti ili a nairaman iti Code Orange a masipsiputan gapu iti manamnama a nainget a balubal iti politika dagiti kandidato.

Impalgakna pay ti namnamana nga awan ti kinadamsak iti politika a mapasamak iti probinsia nangruna sadiay Narvacan no dagiti polis ket agtalinaedda a patas ken saanda a makibiang ken kumanunong uray iti sino a politiko ta kas kameng ti PNP ket nasken nga agbalinda a neutral iti eleksion. Nagpalagip pay kadagiti polis a maipawil kadakuada ti agserbi a security escort dagiti politiko no awan ti pammalubos ti Commission on Elections.

Impatalgedna ti agtultuloy a panagtimpuyog ti Comelec – PNP ken Armed Forces of the Philippines iti panangsaluad ti nakappia ken natalna nga eleksion kontra ti posible a pannakibiang dagiti rebelde ken private armed groups. Impakaammona ti agtultuloy a nasinged a coordination ti Comelec ken PNP tapno maipatungpal dagiti security measures para iti nakappia nga eleksion.

Impakaammo pay ni Gen. Albayalde nga agtultuloy ti panagpasiarna kadagiti nagduduma a lugar iti Pilipinas tapno palagipanna dagiti kameng ti PNP kadagiti annongenda iti panawen ti kampania ken eleksion. Nagapila pay ti PNP Chief kadagiti umili ti pannakikooperarda iti PNP tapno maliklikan ti pannakapasamak dagiti krimen ken mapagtalinaed ti natalna a panagpipili.

Ni Gen. Albayalde ket kinadua ni PNP Region I Director Romulo Sapitula, ken pinasangbay da Ilocos Sur Police Provincial Director Colonel Adolfo Rafanan, ken dagiti dadduma pay nga opisial ken kameng ti PNP iti Ilocos Sur.