Get-away car iti Vigan City robbery, naaramat iti panagtakaw iti La Union

VIGAN CITY – Umun-uneg ti misterio ti panagtakaw a naisayangkat iti nasapa a malem ti Abril 3 iti Bonifacio Street, Barangay I ditoy┬á kalpasan a natakuatan a naaramat ti get-away car iti sabali a panagtakaw iti probinsia ti La Union idi napalabas a bulan daytoy a tawen.

Iti follow-up investigation nga insayangkat dagiti polis iti Land Transportation Office ditoy Vigan, naammuan a nainbolbar ti Honda City nga inaramat dagiti di pay nabigbig a tattao a nangitaray iti tallo a bag a naggian iti uneg ti maysa a Toyota Fortuner iti maysa a robbery iti Agoo, La Union idi Marso 6 daytoy a tawen.

Kitkitaen dagiti inbestigador ti anggulo nga imbati dagiti mannanakaw ti get-away car agsipud ta napudot daytoyen.

Kas maibatay iti registration certificate a nasukainan dagiti inbestigador iti uneg ti lugan,  nakarehistro daytoy iti nagan ti maysa a  Rizaline Poliarco, residente iti L18, B 32, Kapac St., Dagatdagatan, Caloocan City. Sakbayna, mapapati a maysa a Ramon Jocson a taga-Project 6, Parañaque City ti orihinal nga akinkukua iti nasao a get-away car.

Commando style ti kapardas ti pannakaisayangkat ti  panagtakaw ken panaglibas dagiti mannanakaw.

Iti report a dimmanon iti polis, kellaat a simmardeng ti maris dapo a Honda City, addaan plate number WBK 688, iti likudan ti Toyota Fortuner a nakaparking iti igid ti kalsada ti Bonifacio, sipapardas a dimsaag dagiti naglugan, binuongda ti akinlikud a sarming ti lugan,  ginammatanda dagiti tallo a bag iti uneg ti lugan, sada sipapardas a limmugan ket nagpakaskasen ti get-away car nga immadayo.

Sakbay ti insidente, imparking ni Atty. Carlo Oliva delos Santos, 29, naasawaan ken residente iti KM 35, National Road, Canlalay, Bi├▒an, Laguna ti Toyota Fortuner iti asideg ti My Vigan Home iti nadakamat a kalsada iti pasado ala una ti malem iti dayta nga aldaw sada simrek ken ti pamiliana iti maysa a panganan iti asideg.

Segun iti report, kasangsangpet dagiti biktima  ditoy siudad a pangpalabsanda koma iti Semana Santa idi mapasamak ti panagtakaw.

Iti pursuit operation nga insayangkatda, nasarakan dagiti nagtipon a police elements a pakaibilangan dagiti polis-Vigan nga indauluan ni Police Senior Inspector Mario R. Badiola, ISPPSC nga indauluan ni Police Supt. Emmanuel H. Reyes, IDMS Police Supt. Maximo Taclas, Bantay police nga indauluan ni Police Senior Inspector Benedicto G. Cardenas ken Ilocos Sur HPG nga impanguluan ni Police Inspector Reymundo L. Maramag ti Honda City a naabandona iti barangay road, sumurok-kumurang 25 metros manipud ti national highway a sakup ti Barangay Paing, Bantay.

Ngem saanen a nasapulan dagiti polis dagiti suspek a mapapati nga immalis a simmakay iti sabali a luganda.

Saan met a narekobre dagiti polis dagiti bag a natakaw iti uneg ti lugan ni Oliva a mapapati a naglaon kadagiti aruaten ken personal belongings dagiti biktima.

Agtultuloy ti panagimbestiga dagiti polis no asino dagiti nangisayangkat iti panagtakaw.#