Getaway car iti Sta. Cruz pawnshop robbery, inabandona dagiti suspek bayat pursuit operation

STA. CRUZ, Ilocos Sur РPositibo  a binigbig ti maysa a kustomer ti natakawan a pawnshop ditoy nga ili a kukuana ti aritos a maysa kadagiti alahas a nasarakan iti uneg ti behikulo nga inabandonar dagiti suspek bayat ti pursuit operation nga inwayat dagiti polis-San Fernando City idi malem ti Nobiembre 17.

Binigbig ni Ma. Teresita Quericol, residente iti Barangay Calaoaan, Sta. Cruz, Ilocos Sur a kukuana ti sangaparis nga aritos nga agdagsen iti 2.5 grams babaen ti ladawan nga impakita kenkuana dagiti polis kalpasan a nainbentario dagiti alahas ken dadduma pay a banag a nasarakan iti uneg ti Toyota Corolla, model 1992 nga addaan plate No. TAR-975 a mapapati a gateaway car dagiti suspek kalpasan a tinakawanda ti HL Henry Lhullier Pawnshop ken Farmacia Monlyzamae idi rabii ti Nobiembre 13.

Inabandonar dagiti di nabigbig a suspek ti kotseda  sada naglibas idi maipasuli ida dagiti polis a nangkamat kadakuada iti sango ti pasdek ti DENR, RO1.

Malaksid kadagiti assorted nga alahas a mapattapatta nga agbalor amin iti P120,300.00, naibati iti lugan ti maysa nga acetylene tank, 7 laptop/netbook nga adda kakuyogda nga aksesoria, 7 cellular phone, polo shirt nga uniporme ti Supreme Court ken Philippine Coast Guard Auxiliary, assorted nga identification cards ti maysa a Glenn Alvin P. Orille a nakailanadan ti adres a 80A St. Mary St., Urbano Palma, Baguio City a mapapati nga inyisio ti Bureau of Immigration, Military Intelligence Group 15, Samahang Magdalo ken Supreme Court.

Idi agsapa ti Nobiembre 14,  nagreport iti polis ni Francisco Ganapin Jr., area manager, a natakawan ti HL Henry Lhullier Pawnshop, pakairamanan ti Farmacia Monlyzamae a mapapati nga insayangkat ti Acetelyne Gang iti nadakamat a rabii.

Natakaw iti pawnshop dagiti nadumaduma nga alahas nga agbalor iti P1,255,100.00; dagiti rematado nga alahas nga agpateg amin iti P128,700.00 ken cash nga agdagup iti P150,850.67.

Nakurimes met iti parmasia dagiti assorted coins nga agdagup iti P1,203.00.

Naduktalan ti panagtakaw idi napan aglukat ni Ganapin iti parmasia ta naipasabat kenkuana ti angot ti napuoran a koriente ket idi simrek, nakitana laengen dagiti medicine shelves a naiwarawara.

Naduktalan laengen ni Ganapin ti dakkel nga abut iti likud ti shelf nga agturong iti vault ti pagsaldaan.

Idi simrek ti biktima, nakitana a nakaluban ti sarming a ridaw ti pawnshop iti linoleum ken adda nakali a dakkel nga abut iti suelo.

Iti panagimbestiga dagiti polis, nakastrek dagiti mannanakaw babaen ti drainage canal nga agturong iti  pawnshop sada nagkali iti abut  iti yuunegda iti pagsaldaan.

Idi addadan iti uneg, linuktan dagiti mannanakaw ti vault babaen ti acetylene torch sada kinurimes dagiti linaonna nga alahas ken kuarta.

Kinuna dagiti inbestigador a mangiwayatda iti follow-up operation mainaig kadagiti assorted nga IDs a nasarakan iti getaway car. (Tawid News)