CABUGAO, Ilocos Sur – Ginansilio a plastic bags ti inwaras itay nabiit ni Mayor Edgar S. Cobangbang, Jr. para kadagiti agbasbasa iti first year kadagiti amin a pagadalan- sekundaria ditoy nga ili.
Karaman dagiti pagadalan a nagiwarasan ni Cobangbang ti Cabugao National High School, Cabugao Institute, Lipit National High School ken Sisim National High School.
Nakikammayet iti daytoy a gannuat ti Cabugao Ladies Intensified Group (CABULIG), nongovernment organization nga idadauluan ti kaingungot ni Cobangbang a ni Jerlie S. Cobangbang.
Tumultulong ti nasao a gunglo a mangipapaay iti livelihood kadagiti babbai babaen ti panagaramidda kadagiti bag a pakaaramatan ti recycled a plastik.
Kinuna ti mayor a paset daytoy ti programana a mangitandudo iti pannakasaluad ti aglawlaw babaen ti pannakausar dagiti non-biodegradable materials wenno dagiti saan a marunot a basura a mangipaay metten iti panggedan kadagiti umili ditoy nangruna dagiti babbai.#
