Ginasut a naiburandis a serbesa a karga ti trailer-truck, pinidut nga insako dagiti tattao

SANTIAGO, Ilocos Sur – Arig nagpiesta dagiti tattao iti ginasut a beer a naiburandis manipud iti trailer truck a nabalingtuad Ā iti kataltalonan iti igid ti kalsada ti Barangay Bigbiga ditoy nga ili idi malem ti Oktubre 29.

Nagreklamo iti polis dagiti pahinante ti International 18-wheeler trailer truck gapu ta iti baet ti panangiparitda, saanda a naigawid dagiti tattao a nagpidut lattan kadagiti naiburandis a Red Horse Beer iti igid ti kalsada.

Segun iti report, agpaamianan ti nasao a lugan ket idi agdaldaliasat daytoy iti nadakamat a barangay iti agarup alas 3:00 ti malem ti nadakamat a petsa, di nakontrol ti drayber ti manibela ket naturongna ti kataltalonan a nakaigapuan ti pannakaiburandis dagiti kargana a serbesa.

Kinuna ti maysa a pahinante nga imbes a tumulong dagiti tattao, inalistuanda ketdi ti nagisako kadagiti beer nga inyawidda kadagiti pagtaenganda.

Kabayatanna, dua a bus ti nainbolbar iti aksidente a napasamak sadiay Tagudin idi Oktubre 28 ken iti Candon City idi Oktubre 29.

Agdagup iti 29 a pasahero ti nadundunor idi dinungpar ti Dominion Bus a minaneho ni Benjamin Abella y Elejo, 52, naasawaan, ken residente iti Vigan City, ti steel fence sa naisarubsob iti bakante a lote ti maysa nga agnagan Mrs. Cuaresma.

Naitaray amin dagiti pasahero iti Tagudin General Hospital and Capillariasis Center iti Barangay Bio, Tagudin para iti pannakataming dagiti dunorda.

Innem a nadunor a pasahero a pakairamanan da Jefrey Gabor, Marjorie Diega, Marelen Puriran, Leo Bae, Albert Roman ken Jackelyn Mupas ti naiyalis itiĀ  Ilocos Training and Regional Medical Center (ITRMC), San Fernando City, La Union gapu ta nakarkaro dagiti sugatda.

Segun iti report manipud iti polis-Tagudin, agpaabagatan a direksion ti bus ket iti kurba a nakapasamakan ti insidente, mapapati a linisian ni Abella tiĀ  kasabatna a maysa a luganĀ  a nagobertek iti sabali a lugan ket napukawna ti kontrolna iti manibela a puon ti pannakaidungpar ti bus iti nasao nga steel fence sa naisarubsob iti bakante a lote.

Naglibas ti drayber ti bus kalpasan ti aksidente.

Iti met aksidente iti Barangay San Juan, Candon City idi Oktubre 29, naireport a natay a dagus ni Rosendo Joffer, 27, residente iti Barangay Bugui, Lidlidda, Ilocos Sur, idi kinadinnungpar ti motorsiklona ti Partas Bus.

Kalpasan ti sumagmamano nga aldaw, pimmusay met ti kinasakay ni Joffer a ni Sandy Mark Eusebio, 25, residente iti Poblacion Norte, Lidlidda iti ospital a nakaitarayanna.

Iti inisial nga inbestigasion dagiti polis, agpaabagatan ti motorsiklo a minaneho ni Joffer ket obertekanna ti dump truck ngem masabatna metten ti agpaamianan a Partas a minaneho ni Roben Antolin, residente iti Barangay Suagayan, Sta. Lucia, Ilocos Sur ket nagdinnungparda.

Segun iti report, indarusdos ti bus ti motorsiklo iti sumagmamano a metro a puon ti nakatayan a dagus ni Joffer.

Iti pannakaisurat daytoy, madama ti panagpapatang dagiti agsumbangir a partido para iti amicable settlement ti nasao nga aksidente.#