GM So, kampeon iti Candon chess tournament

CANDON CITY.  Pinaneknekan manen ti kaubingan a grandmaster iti pagilian ti siglatna iti chess idi nagkampeon iti Mayor Allen Singson Cup Open Chess Tournament a naangay ditoy itay nabiit.

Nakagun-od ni Grandmaster Wesley So, agtawen laeng iti 14,  addaan iti ELO rating a 2396, iti 6 puntos iti panangiyalatna iti P30,000  a premio iti torneo a nakipartisiparan ti 45 nga umaayam iti ahedres a naggapu iti nadumaduma a lugar ditoy ken sabali pay a siudad ken probinsia.

Naisayangkat ti torneo iti tallo nga aldaw idiay Social Hall, Stern Mall, Candon City.

Walo laeng kadagiti 15 nga addaan iti ranggo iti ahedres, ti nakastrek ti top 10 iti daytoy a pasalip.

Inyalat ni National Master Ronald Llavanes ti maikadua a puesto idinto a maikatlo ni Ronald Adaya, ti kakaisuna a non-title chess player, taga-Candon City.

Nagrimat met iti torneo ti maysa a 12 ti tawenna, ni Jan Emmanuel Garcia, taga-Ilocos Sur ngem aggigianen idiay Manila ta simrek iti maika-10 a puesto.

Dagiti dadduma pay a nangabak: NM Mirabeau Maga (4th), Rustum Tolentino (5th), International Master Chito Garma (6th), Richard Bitoon (7th), NM Nicomedes Alisangco(8th) ken Eduardo Agagon (9th).

Saan a nakastrek iti top 10  da NM Efren Bagamasbad, Jerome Balico ken Adrew Vasquez.

Daytoy ti maikadua a gundaway a nakisalip ditoy  ni So.  Immuna idi tawen 2006.

Tallo a dibision ti napagsasalipan iti torneo: Open Division, 16-under Division ken ti 12-under Division.

Naangay ti torneo babaen ti sanction ti National Chess Federation of the Philippines ket makatulong daytoy iti panagpangato ti ELO rating dagiti mangabak.

Sakbay ti torneo, imbalat amin ni So dagiti 25 nga umaayam iti simultaneous exhibition game.(Danny Antalan)