GMA, indauluanna ti Rizal Day celebration iti Ilocos Sur

VIGAN CITY – Indauluan ni Presidente Gloria Macapagal Arroyo ti pannakaselebrar ti maika-113 nga anibersario ti pannakatay ni nailian a bannuar Dr. Jose Rizal ditoy historikal a siudad idi Disiembre 30.

Ni Arroyo ti nangidaulo iti flag raising ceremony a naangay iti Plaza Salcedo ditoy Vigan iti pasado alas siete ti bigat ti Disiembre 30 a nakigiddan iti pannakaingato ti amin a bandera iti sapasap a pagilian.

Inasistiran da Gov. Deogracias Victor Savellano, Ilocos Sur First District Congressman Ronald Singson, House Deputy Speaker Eric Singson, Vigan Mayor Eva Marie S. Medina ti Presidente iti flag raising ceremony a naangay iti Plaza Salcedo iti sanguanan ti provincial capitol.

Karaman a nakipagselebrar iti Rizal Day ditoy dagiti nangangato nga opisial ti Armed Forces of Philippines, Philippine National Police, Philippine Army, Philippine Air Force, Philippine Navy, Northern Luzon Command ken Police Regional Office I.

Karaman a nakipartisipar iti selebrasion da National Historic Institute Executive Director Ludovico Badoy, Presidential Assistant for Region I Enrie Mendoza ken dadduma pay nga opisial.

Nakipartisipar pay iti selebrasion dagiti opisial ti gobierno probinsial, empleado ti nadumaduma nga ahensia nasional, city officials ken empleado, ken rinibu nga agnaed ditoy siudad ken kabangibangna nga ili iti daytoy posible a maudin a panangselebrar ni Ms. Arroyo iti Rizal Day a kas presidente.

Impatangatang dagiti nakauniporme nga honor guards ti taps ken nagpaputokda iti namitlo manipud iti pito a riple kalpasan ti seremonia kas tradisional a panangrespetoda iti nailian a bannuar.

Kalpasanna, nagampayag ti maysa nga helicopter iti nakaangayan ti seremonia ket nagbitor iti confetti ken petalo ti sabong.

Kalpasan ti pammigat iti provincial capitol, nagturong ti Presidente iti Banaoang, Bantay tapno inaguraranna ti baro a Quirino Bridge a mamagkamang iti umuna ken maikadua a distrito ti Ilocos Sur sa iti Tagudin, Ilocos Sur tapno luktanna ti Amburayan Bridge a mamagkamang iti Ilocos Sur iti La Union.

Napaltogan ni Rizal iti Bagumbayan idi Disiembre 30 1896 gapu iti panangidagadagna iti reporma kabayatan ti panagturay dagiti Kastila iti pagilian.

Ti pannakatayna ti nangsindi iti beggang a nangiduron kadagiti Filipino nga umalsa maikontra kadagiti Kastila.

Idi napan a tawen, indauluan ti Presidente ti Rizal Day celebration iti San Fernando City, La Union. Iti kallabes, iti Mindanao ken iti Baguio City ti nakaangayan iti Rizal Day rites.

Ti tema ti selebrasion itay Disiembre 30, 2009: Kabayanihan ni Rizal: Daluyan ng Kagitingan at Pagkakaisa.#