Footer

GMAIS isubli ni DV tapno masolbar problema ti panaglakuan ti mais

VIGAN CITY – Inwaragawag ni Gobernador Deogracias Victor “DV” Savellano nga isublina ti Grains Marketing Assistance for Ilocos Sur (GMAIS) tapno tumulong a mangsolbar iti problema ti panaglakuan iti mais ken dadduma pay a bukbukel a produkto ti probinsia.

Kinuna ni Savellano nga agtultuloy ti memorandum of agreement iti nagbaetan ti probinsia ken ti San Miguel Corporation a nakaitudingan ti  floor price dagiti mailako a mais.

Indagadag ni Savellano ti pannakamula amin a bakante a lote para iti panagdur-as ti biag dagiti mannalon idinto nga impasingkedna a sisasagana ti gobierno probinsial a makikammayyet kadagiti LGUs para iti panagballigi daytoy a gannuat.

Iti panagbitlana, ni kinuna ni Savellano a “ti pinagrang-ay ti kabibiag iti tunggal maysa ti kayattayo a magun-od ”.

Timmabuno iti Corn Congress a naangay iti provincial capitol itay Nobiembre 23 ti nasurok dua gasut nga agmulmula iti mais iti probinsia a naggapu iti ili a San Vicente, Caoayan, Santa,  Sto. Domingo, Bantay, San Ildefonso, Santiago, Candon City, Narvacan, Magsingal, CAbugao, Sinait, San Juan ken Nagbukel ken dagiti kameng ti Vigan Corn Farmers Asociation.

Karaman a timmabuno iti nasao a Congress da  Ferdinand Matro, regional corn coordinator ti Department of Agriculture, RFU I, San Fernando City; Vicente Estrella ken Joayde Paul B. Padilla, MonsantoTechnical sales representative iti North Luzon;  Oscar Tobia, provincial corn coordinator, ken dagiti manager ti Nueva Segovia Consortium ken Ilocos Sur Cooperative Bank.

Bayat ti Congress, impalgak  ni Matro nga agkurang iti agdagup 800,000 metriko tonelada ti kasapulan a mais ti pagilian iti agdama.

Kinuna ni Matro a 6.7 milion a metriko tonelada  ti kasapulan ti Pilipinas idinto a nakurang a 6 milion laeng ti produksion iti sibubukel a pagilian.

Agdagup iti 300,000 metric tons ti produksion ti Rehion I, karaman ditoy ti 70,660 metric tons nga aggapu iti Ilocos Sur.

Iti met presentasion ni Oscar Tobia,  13,000 nga ektaria iti 18 nga ili iti probinsia ti mamulmulaan iti mais.

Kinunana nga iti napalabas a corn season, ag-average iti 5.5 tonelada kada ektaria ti naapit ket P60,000 ti napaglakuan iti tunggal ektaria idinto nga immabot iti P33,000 ti nagasto, isu a P27,000 ti naganansia ti mannalon iti tunggal ektaria a minulaanna.

Kabayatanna, intudo dagiti opisial ti Department of Agriculture ti apla toxin (buot) a masansan a pakaigapuan ti nababa a presio ti mais.

Panawenen a baliwan dagiti mannalon ti bin-i nga imulmulada, indagadag dagiti opisial ti DA.#