Pateg ti GMRC subject kadagiti ubbing, impaganetget ti Vigan Central School principal

VIGAN CITY — Kinapateg ti saanen a maisursuro kadagiti pagadalan a subject a Good Manners and Right Conduct (GMRC) kadagiti agbasbasa nga ubbing tapno matubay ken dumakkelda nga addaan iti nasayaat a galad ken kababalin.

Dayta ti impaganetget ni Mrs. Editha Bagcal, Principal ti Vigan Central School kadagiti kameng ti Ilocos Sur Integrated Press kabayatan iti naangay a Kapihan iti Amianan Media Forum.

Inlawlawag ti Principal a kas maysa a nagadal iti public school ken mangidaulo iti kadakkelan nga eskuela iti elementaria iti Vigan City ket mapaliiwna ti dakkel a nagdumaan iti galad ken kababalin dagiti agbasbasa idi panawenna ken dagiti ubbing iti agdama. Sinalaysayna a nasuksukiren nga amang dagiti ubbing ita gapu ti kaawanen ti subject a GMRC ken maipawilen ti agbaut wenno agkeddel a pangdisiplina kadakuada.

Impalgakna a maysa pay a puon iti panagsukir dagiti ubbing ket gapu ta maipawilen kadagiti mangisursuro iti saan a mangparuar kadagiti pupil-da uray no rebbengna a saanda a maipasa ta addan direktiba ti liderato ti Department of Education. Innayonna pay a no saanen a kayat ti estudiante nga ituloy ti panagadalda ket akmenda pay ti mapan mangsukon ken mangay-ayo kadakuada.

Nagapila ti Principal kadagiti padana a mangisursuro nga anusanda nga isuro ken disiplinaan dagiti adalanda ta dayta ti naindaklan nga akem nga ibaklayda kas maestro wenno maestro ken maibilang a maikadua a nagannak dagiti adalanda.

Kiniddawna met kadagiti nagannak nga isuda ti kangrunaan a mangisuro kadagiti annakda. Kiniddawna ti panangipasagepsep dagiti nagannak kadagiti annakda ti kinapateg ti adal ken bayabayen ken suportaranda ida iti panagadalda agingga iti makaturposda tapno maaddaando iti naraniag a masakbayan. ●