Footer

Gobernador, kinondenarna insidente ti panagbomba

SAN FERNANDO CITY – Kinondenar ni Gov. Victor Ortega ti  panagbomba itay nabiit a napasamak iti P. Talavera St., Barangay 1, ditoy ket indagadagna kadagiti umili iti panangireportda iti polis  aniaman nga impormasion a mangitunda iti pannakatiliw dagiti nagisayangkat.

Dinawat ni Ortega, chairman ti Regional Peace and Order Council (RPOC), kadagiti kailianna iti panagtitinnulongda para iti nadaras a pannakasolbar iti panagbomba ditoy.
Kabayatanna, imbilin ni Police Chief Supt. Leopoldo Bataoil, regional director, ti madagdagus a pannakaideploy ti bomb squad ken iti naing-inget a pannakaipakat ti  security alert iti siudad kalpasan ti panagbettak ti maysa a bomba iti maysa a barangay iti siudad.
Imbilin pay ni Bataoil ti manayon a deployment ti  Special Weapons and Tactics (SWAT)team ken Explosive

Ordnance Disposal (EOD) personnel iti uneg ti siudad tapno malapdan ti pannakaulit ti napasamak.
Bimtak ti maysa a bomba iti pagbasuraan iti asideg ti Marcos building iti pasado alas onse a nakadunoran ni  Hipolito N. Aragon, 59, naasawaan, residente iti Barangay Tanqui ken maysa a pintor iti gobierno iti siudad.
Naitaray ni Hipolito iti Ilocos Training and Regional Medical Center para iti pannakataming dagiti sugatna.
Kinuna ti polis a gapu iti pigsa ti panagbettak ti bomba, nadadael ti paset ti balay ti maysa nga abogado ken nabuong ti kannawan a sarming ti maysa a kotse a nakaparking iti lauden a paset iti asideg ti bimtak a bomba.
Kinuna ni Bataoil a madama ti panagpalutpot dagiti inbestigador para iti pannakabigbig ken pannakaaresto dagiti nagisayangkat iti panagbomba kasta met nga am-amirisen ti PNP laboratory dagiti ebidensia a naurnong ti SOCO tapno maammuan no ania ti kategoria ti bomba a napabettak. #