Footer

Gobernador, saan a mapnek performance ti NTA

VIGAN CITY – Saan a mapnek ti gobernador  iti performance ti National Tobacco Administration  (NTA) nupay daytoy nga ahensia ti napusgan a mangkita iti pagsayaatan dagiti agmulmula ti tabako iti probinsia.

Kinuna ni Gov. Deogracias Victor “DV” Savellano a  dagiti koma mannalon ti  konsentrasion ti NTA  ket bayabayenna koma ida, saan ket nga upayen, maigapu ta aggapu kadakuada ti sueldoda.

Kinuna ni Savellano nga adalen koma ti NTA no ania ti solusion dagiti problema dagiti mannalon, no kasano a mapapintas ti kalidad dagiti maapit a tabako ken kangrunaanna ti pannakailako dagitoy iti kapkapnekan a presio, ken ayonanna koma ti biang dagiti farmers, saan a dagiti buyers.

Kinuna ti gobernador a rumbeng a maipaay ti pundo ti nadakamat nga ahensia iti pagsayaatan dagiti agmulmula.

Innayonna a nupay napintas dagiti programa ti NTA kas iti proyektona a mangipatakder iti planta nga agpartuat iti papel manipud iti tobacco dust wenno raw materials ti tabako, ken panangmaneharna iti  Multiline Food Processing Plant sadiay ili ti Santa,  iyun-una  koma nga aramiden ti NTA ti direkta a serbisio para kadagiti farmers.

Iti maysa nga interbiona iti lokal a radio, nadakamat ti gobernador a nagorder iti NTA iti 1,000 reams a papel nga usarenda iti kapitolio ngem imbaga ti nasao nga ahensia a masapul ti down payment agsipud ta awan ti pagpuonanda ken sadanto maited ti order kalpasan ti innem a bulan.

“No adu dagiti konsiderasion, kasano a maengganiomi dagiti dadduma a mayat pay a gumatang?” nakuna ti gobernador.

Kinuna ni Savellano nga iyun-una koma ti NTA ti panangadalna iti panagmula iti napintas ti kalidadna a tabako sakbay kadagiti sabali a banag.

“Mapantayo iti prioridad a masapul a papintasentayo ti bulong ti tabako,” kinuna ni Savellano idinto nga inyunay-unayna a ti bulong ti tabako ti numero uno a kitaen dagiti farmers, maud-udi ti waste materials daytoy.

Maysa kadagiti rumrummuar a problema dagiti agmulmula iti tabako ti kinangato ti magasto iti maipatakder a pugon ta umabot iti nasurok P30,000.

Impasigurado ni Savellano nga apaman a maawat  ti provincial government  ti bingayna manipud iti R.A. 7171, mangilatang iti P3 million  para iti pannakaipatakder dagiti pugon nga usaren dagiti tobacco farmers.#