BAGUIO CITY – Linagidaw ti maysa nga opisial ti grupo dagiti mannalon ti panaggatgatang ti gobierno iti native a variety ti bagas a tradisional a mairaraep iti Cordillera sana ilako iti ballasiw-taaw idinto nga agang-angkat iti bagas a napugsitan kadagiti kemikal a mabalin a makaited iti peggad iti salun-at kadagiti umili.

Impalgak ni Andres Wailan, vice chair ti Apittako, a gatgatangen ti gobierno iti P50 kada kilo ti unoy, maysa a native variety ti bagas ket addan pito a tonelada nga impatulodna iti Estados Unidos.

Itay napan a bulan, nagmartsa iti Session road ti Apittako, maysa a grupo dagiti mannalon iti Cordillera, ket binabalawda ti gobierno gapu iti panagangkatna iti bagas manipud iti ballasiw-taaw idinto nga aglaklako iti bagas a nataraken iti tradisional a wagas.

“Idinto nga aggatang ti US iti di napugsitan iti pestisidio a bagas ti Cordillera, agang-angkat ti pagilian kadagiti rice varieties a napugsitan iti kemikal a mabalin a makapeggad iti salun-at,” kinuna ti vice chair ti Apittako.

Linagidaw ni Wailan ti panangawis ti gobierno kadagiti mannalon iti Cordillera nga agmula iti traditional rice varieties saan a tapno para iti lokal a kasapulan no di   maiyeksportda iti sabali a pagilian.

Naammuan iti rekord ti National Food Authority nga iti napalabas a tawen, sumurok a 400,000 kaban a naangkat a bagas ti dimmanon iti Cordillera.

Ngem iti report ti Bureau of Agricultural Statistics, agsobsobra ti produksion ti Cordillera a bagas para iti 1.6 milion nga agindeg ditoy.

Kinuna ni Wailan a gapu iti panangallukoy ti gobierno, adda dagiti mannalon nga agmulmula kadagiti indigenous rice varieties a mailako laeng iti sabali a pagilian tapno dakdakkel ti mapastrekda.